NM Roque naghari sa 'stay home' chessfest
CEBU, Philippines — Si National Master Merben Roque maoy nanghawod sa labing unang "Stay at Home" Online Blitz Tournament nga giduwa sa Lichess niadtong Huwebes. Sila si Roque ug Rhenzi Kyle Sevillano nagtabla uban ang 65 puntos matag usa human sa duha ka oras nga torneyo nga giorganisar ni International Master Kim Steven Yap sa Cebu School of Chess, apan si Roque maoy mibulsa sa P3,000 nga unang ganti gumikan sa mas taas niining tie-breaker.
Nalandig sa ikatulong puwesto si Michael Joseph Pagaran uban ang 57 puntos, samtang sila si Eden Diano ug Allan Pason maoy miokupar sa ikaupat ug ikalimang dapit bitbit ang 56 ug 55 puntos.
Naglangkob sa top 10 mao sila si Bryle Arellano, Rommel Ganzon, Bonn Rainauld Tibod, Godfrey Villamor, ug Remegio Galenzona. Sunod nga kalingawan sa mga Sugbuanong magduduwa og ahedres taliwala ning kwarantin mao ang laing online tournament nga pasiugdahan sa Cebu Executives and Professionals Chess Association (CEPCA) karong Mayo 16.
- Latest
