Asaytono luwas na sa peligro
CEBU, Philippines — Luwas na sa peligrosong kahimtang si PBA legend Nelson Asaytono human kini gi-ataki sa kasingkasing sa miaging semana.
Mao kini ang gipahibalo ni player agent Danny Espiritu nga sa kanunay nagkontak ni Bong Alvarez, ang kanhi teammate ni Asaytono sa Philippine national team nga mao ang naghatag kaniya og updates kabahin sa kondisyon sa panglawas sa 53-anyos nga kanhi bitoon sa PBA.
"Yes (he suffered from a heart attack) but Bong Alvarez said he's okay already. Though four days ago, he (Asaytono) was still in the ICU (intensive care unit)," matud pa ni Espiritu segun sa taho sa ESPN5.
Si Asaytono nga maoy No. 2 overall pick sa 1989 PBA rookie draft, nakaduwa sud sa 17 ka season sa liga.
Gibunyagan og "The Bull" gumikan kay daw sa mura'g toro niyang dinuwaan, si Asaytono nakadaog og pito ka kampiyonato sa PBA uban sa Purefoods, Swift ug dayon sa Red Bull sa naghinapos nga bahin sa iyang karera.
Nasakop sa PBA All-Star 10 ka higayon, si Asaytono kaduha nahimong Best Player of the Conference ug katulo naapil sa Mythical First team sa mabulukon niyang karera sa PBA.
- Latest
