Westbrook mikulit laing kasaysayan

MANILA, Philippines — Anaa na siya sa bag-o niyang koponan nga Houston Rockets, apan ang kanhi MVP nga si Russell Westbrook way undang sa pangolekta og mga record labing uwahi niini mao ang pagsaka niya sa ikaduhang dapit sa all-time triple-double list atol sa ilang kadaugan batok New Orleans Pelicans, 126-123, kagahapon didto sa Toyota Center sa Houston, Texas.

Si Westbrook mikutlo sa ika-139 niyang triple-double nga maoy ikaduha sa labing daghan sa kasaysayan sa NBA. Nagsunod siya sa legendary nga si Oscar Robertson kinsa nag-una sa iyang 181 ka career triple-doubles. Nalabwan ni Westbrook ang laing NBA great nga si Magic Johnson.

“I know nowadays getting a triple-double seems normal, but I take a lot of pride and a lot of energy and sacrifice and a lot of things I do off the floor to get ready to compete and play at a high level,” matud ni Westbrook sa Associated Press. “For me, that’s a great accomplishment, especially growing up and never thinking I would be able to play in the NBA. Now, I’m able to be in the history books.”

Si Westbrook mirehistro og 28 puntos, 13 ka assists ug 10 ka rebounds alang sa Rockets nga misakmit sa labing una nilang daog sa season human usab napilde sa opener batok Milwaukee Bucks niadtong Biyernes. Ang superstar ug katimbang ni Westbrook nga si James Harden miiskor og 29.

Si Rockets coach Mike D’Antonio mipauwan og pagdayeg sa bag-o niyang sinaligan kinsa gihulagway niya nga maoy kuwang aron hingpit na nga makabalik ang Rockets sa finals.

Ang Pelicans nga padayong miduwa nga wala ilang star rookie nga si Zion Williamson kinsa nagpaalim sa injury, gibidahan ni Brandon Ingram nga adunay 35 puntos, samtang si Josh Hart mitira og 23 puntos.