Wildcats dalaygong’ miresbak sa Jaguars

CEBU, Philippines — Ang Cebu Institute of Technology-University (CIT-U) Wildcats dalaygon kaayong miresbak sa University of San Jose-Recoletos (USJ-R) Jaguars.

Alkansi og 22 puntos sa second half, ang Wildcats sa kalit lang nagmangtas dayon na ngadto sa pagkawras sa Jaguars, 82-79, sa 19th Cebu Schools Athletic Foundation, Inc. (CESAFI) men’s basketball tournament  niadtong weekend diha sa Cebu Coliseum.

Tam-is kaayo ang panimalos nga gidalit sa Wildcats batok sa Jaguars nga mipukan kanila sa iskor nga 72-67 atol sa pagbukas sa liga niadtong Agosto 31.

Nakab-ot kini sa Wildcats bisan pa man og wala ang duha nila ka pambato nga sila si Jemcerson Sable ug Mark Christian Kong nga mitambong sa ilang gradwasyon.

Taliwala sa pagpanginit ni Jessie Aloro Jr. sa ikatulong kuwarter, ang Wildcats dali nga nakagukod hinungdan nga nakasikit kini ngadto na lang sa usa ka lugas, 61-62, padung ngadto sa pinal nga 10 minutos sa aksiyon.

Apan sa kalit lang napiangan ang Wildcats gumikan kay si Aloro nayayay ang walang kiting hinungdan nga wala na makaduwa pa. Bisan pa man niini, si Aloro mao gihapon ang nangu sa CIT-U uban ang 25 puntos.

Wala hinoon kini makabalda sa Wildcats kay si coach Edsel Say Vallena napabunlot pa og pipila ka mga alas sa iyang sanina.

“Ang among team dili lamang sa pipila ka pinili nga mga players. Moduwa mi isip usa ka team,” matud pa ni Vallena. “Matag usa nila sa kanunay andam nga mohulip sa lain.”

Tuod man, sila si Karl Malone Ventura, Clark Adrian Con-ui ug John Carl Escalona midala sa papel nga mga bida aron agakon ang Wildcats ngadto sa usa ka mangilngig nga eskapo.

Si Con-ui milansang og krusyal nga tres sa wala pa miposa og upat ka sagunson nga free throws sila si Escalona ug Ventura sa katapusang 30 segundos sa duwa aron pagsilyo sa ikaduhang daog sa Wildcats sud sa walo ka duwa.

“Ako gi-ingnan akong mga players nga ihatag gyud nila ang tanan matag duwa. Maayo nga makuha namo ang respeto sa among rivals pero mas maayo nga modaog mi,” dason pa ni Vallena. “Kay kon magsige mi og kapilde, ang among praktis magkalisud sad kay dili man mi makat-on. Mao gyud na ako motivation nila.” – Emmanuel B. Villaruel

Out-of-towners mi-arangkada sa CEPCA Tatluhan chessfest

Duha ka out-of-town teams ang mi-arangkada gilayon aron saw-an ang sayong liderato sa 3rd Boy ‘Chessmoso’ Memorial Chess Cup Tatluhan Rapid Tournament nga giorganisa sa Cebu Executives and Professionals Chess Association (CEPCA) niadtong Sabado didto sa The Barracks Chess Club sa Robinsons Galleria Cebu.

Ang Noah Declan Chess Team sa Bohol nga gilangkoban nilang Norman Longjas, Glicerio Pardillo Jr ug Genesis Apog ug ang Pinoy Chess Store sa Negros Occidental nga gitimon nilang Bryle Arellano, Eric Abanco ug Romeo Sadia III maoy milugwa nga mga lider uban ang 8.0 puntos matag usa.

Ang defending champion CEPCA Team A nilang Venancio Loyola, Arnolito Cadiz ug Amado Olea miposte og 7.0 puntos aron iposisyon ang ilang kaugalingon sa ikatulo ngadto sa ikalimang dapit uban sa The Bachelors nilang Richard Natividad, Ruel Nuttal, ug Martin Sean Kwan ug Cebu Progress Marketing nilang  Joel Pacuribot, Carlos Moreno ug Bong San Pascual.

Nagdagan gikan sa ikaunom hangtud sa iak-12 nga dapit mao ang Sagay City Chess Club A, Split Second, Triple Lima, Bitoon, CDO Veterans Move, USJ-R Jaguars Team A ug EVC.

Gisalmotan og 64 ka teams, ang duha ka adlaw nga torneyo nga gipaluyohan saJemar Engineering Services, Celjem Construction and Development Corporation, Handuraw Pizza, ug Salon de Rose mitanyag og dul-an sa P100,000 nga ganting salapi sa mga mananaog.

Ang makampiyon mobulsa og P30,000. Ang mopahiluna sa ikaduha ngadto sa ikalimang dapit mokabi og P20,000, P10,000, P7,000 ug P5,000 samtang kadtong maapil sa top 12 dunay P2,000 matag usa.Ang top 3 board players duna say bonus nga P1,000.