5 medalya target ng Pinoy lifters
MANILA, Philippines — Optimistiko ang Samahang Weightlifting ng Pilipinas (SWP) na makakabuhat ito ng apat hanggang limang medalya sa 30th Southeast Asian Games na idaraos sa Nobyembre 30 hanggang Disyembre 11.
Babanderahan ang national weightlifting team ni Rio Olympics silver medallist at Asian Games champion Hidilyn Diaz na sasalang sa women’s 55 kg. division.
“For the SEA Games, we’re aiming for four to five medals. I am hoping that we will get at least one or two medals for men, and four medals for women,” ani SWP President Monico Puentevella.
Sasabak din sina Mary Flor Diaz (45kg), Elien Rose Perez (49kg), Margaret Colonia (59kg), Elreen Ann Ando (64kg), Kristel Macrohon (71kg), John Fabuar Ceniza (55kg), Dave Llyod Pacaldo (61kg), Nestor Colonia (67kg) at Jeffrey Garcia (73kg).
Nais ni Puentevella na mahubog ng mga atletang magkukwalipika sa 2020 Tokyo Olympics at 2024 Paris Olympic Games.
Tiwala rin si Philippine Sports Commission (PSC) Chairman William “Butch” Ramirez na malaki ang mai-aambag ng weightlifting team sa SEA Games.
“The PSC has done its part in giving the athletes the opportunity to train and gave them exposure. The National Sports Associations (NSAs) have made their assessments on their chances and we are counting on them,” ani Ramirez.
May pilak na sa Olympics si Diaz habang nakaginto na rin ito sa Asian Games.
Ngunit wala pang gintong medalya si Diaz sa SEA Games kaya’t isa ito sa misyon ng Zamboanga native lifter.
Nakapilak lamang ito sa women’s -58kg division sa 2013 Myanmar at 2011 Indonesia editions at tanso sa 2007 Thailand meet.
Kamakailan lamang, nakasungkit si Diaz ng dalawang tanso sa 2019 International Weightlifting Federation (IWF) World Championships sa Pattaya, Thailand.
- Latest
