Wildcats, Webmasters motak-op sa first round

CEBU, Philippines — Ang Cebu Institute of Technology-University (CIT-U) Wildcats mosuway pagkulit og talagsaon nga duha ka sagunson nga daog sa dihang ilang sangkaon ang University of Cebu (UC) Webmasters sa duwa nga maoy mosira sa unang hugna sa eliminasyon sa seniors division sa 19th Cebu Schools Athletic Foundation, Inc. (CESAFI) men's basketball tournament karong adlawa diha sa Cebu Coliseum.

Mag-abot ang duha sa alas-5 sa hapon.

Managlahi nga dalan ang giagian sa CIT-U ug UC sa miagi nilang mga duwa.

Ang Wildcats mipakugang sa Southwestern University (SWU)-Phinma Cobras aron pakgangon ang upat ka duwa nilang malas, samtang naputol ang duha ka sunod-sunod nga daog sa Webmasters human sila gikastigo sa University of San Carlos (USC) Warriors, 59-75.

Sa kasamtangan, ang Wildcats nagkupot og 1-4 records, samtang ang Webmasters dunay 2-3 nga marka.

Gumikan niini, seguradong ang duha ka protagonista manglimbasog aron modaog kay makahatag man kini nila og dugang kadasig padung ngadto sa ikaduhang hugna sa eliminasyon.

Sa juniors division, ang University of Southern Philippines Foundation (USPF) Baby Panthers makighamag sa CIT-U Baby Wildcats sa alas-12:30 sa hapon, samtang ang University of San Jose-Recoletos (USJ-R) Baby Jaguars mosuway sa ikalimang higayon paglangkat og daog sa dihang ilang hamagon ang University of Cebu Lapu-Lapu and Mandaue (UCLM) Campus sa alas-2 sa hapon.

Nagsolo karon ang Baby Panthers sa ikatulong dapit bitbit ang 4-2 nga baraha, samtang ang Baby Wildcats usa sa mga nangiwit kay kausa pa makadaog sa upat ka duwa.

Sa pikas bahin, ang Baby Jaguars naglungot-lungot nga moputol sa upat ka sagunson nilang pilde ug hayag kaayo nga ila kining makab-ot gumikan kay ang ilang engkuwentruhon mao man ang UCLM nga bokya pa sab sud sa tulo ka duwa.