Wildcats nadasig human mabitik ang Cobras

CEBU, Philippines — Sama sa ilang gibuhat sa miagi, ang Cebu Institute of Technology-University (CIT-U) Wildcats mikulit sa labing una nilang daog sa makapakurat nga paagi human ilang gipaluhod ang inilog nilang kontra nga usa ka lig-ong title contender karong season.

Mao nang wala kapugngi ni Wildcats head coach Edsel Say Vallena nga batioan og tumang kalipay ug garbo sa iyang dughan ang makapakugang nilang 67-62 pagbihag sa Southwestern University (SWU)-Phinma Cobras aron putlon ang upat ka sagunson nilang pilde sa 19th Cebu Schools Athletic Foundation, Inc. (CESAFI) men's basketball tournament niadtong Sabado sa Cebu Coliseum.

Alang sa Wildcats, ang bugtong team sa seniors division nga way gisaligan nga langyaw nga student-athlete, ang maong kadaogan usa ka dakong dungog.

"Ang among gyung depensa maoy nahimong yawi sa mong kadaogan. Nindot sab kaayo namo pagka-excute ang among plays, ila gyud gituman," matud pa ni Vallena. "Apan labaw tanan, proud kaayo sa akoang mga players for giving their best and playing their hearts out."

Mi-angkon si Vallena nga ang ilang pagbitik sa Cobras nakapadasig kanila ilabi na sa ilang pag-asdang sa katapusan nilang duwa sa unang hugna sa eliminasyon batok sa University of Cebu (UC) Webmasters karong Oktubre 5.

Nangiwit man tuod sila karon sa standings apan ang Wildcats tataw nga naka-angkon og respeto sa ilang mga karibal gumikan sa ilang pag-ihaw sa Cobras.