Cobras, Jaguars laraw motukob ikaduhang daog

CEBU, Philippines – Naglaraw ang Southwestern University-Phinma (SWU)-Phinma Cobras ug ang University of San Jose-Recoletos (USJ-R) Jaguars  nga mokulit og duha ka sagunson nga daog sa ilang pakigsangka batok sa managlahing kontra sa 19th Cebu Schools Athletic  Foundation, Inc. (CESAFI) men's basketball tournament karong adlawa diha sa Cebu Coliseum.

Sa main game , ang Jaguars makigtakos sa University of San Carlos (USC) Warriors sa alas-5 sa hapon, samtang ang Cobras makigtigi sa University of Southern Philippines Foundation (USPF) Panthers sa alas- 3:30 sa hapon.

Ang Cobras nga usa sa mga inilog gumikan sa paghari  sa CESAFI Partner's Cup, misikad sa ilang kampanya pinaagi sa 66-58 nga kadaogan batok sa University of Cebu (UC) Webmasters.

Hayag sab ang sinugdanan sa Jaguars human gibuntog ang Cebu Institute of Technology-University (CIT-U) Wildcats, 72-67.

Sulagma kaayo nga ang Cobras ug ang Jaguars makigtigi og mga kontra nga managlahing dalan ang naagian sa miagi nilang mga duwa.

Ang Panthers miposte og 78-72 nga kadaogan batok sa UC Webmasters, samtang ang Warriors gikunis-kunis sa three-time defending champion University of the Visayas (UV) Green Lancers, 53-74.

Sa juniors division, ang UV Baby Lancers naglaraw nga makabawi sa makauulaw nilang kapildihan sa dihang ilang harungon ang Sacred Heart School-Ateneo de Cebu (SHS-AdC) Magis Eagles sa alas-2 sa hapon.

Sa laing bahin, ang Cebu Eastern College (CEC) Dragons ug UC Lapu-Lapu and Mandaue Campus mosuway pagtilaw og daog sa ilang panag-abot sa ala-1 sa hapon.