Webmasters 2-0 sa inayawan caging

CEBU, Philippines — Ang University of Cebu (UC) Webmasters mibugha sa University of San Jose-Recoletos (USJ-R) Jaguars, 80-70, alang sa ikaduha nilang sagunson nga daog sa 1st Capt. Kirk Bryan Repollo Inter-Collegiate Basketball Tournament-St. Augustine Cup niadtong Sabado sa gabii diha sa Emilio R.M. Jaca Sr. Sports Complex and Cultural Center sa Barangay Inayawan, dakbayan sa Sugbu.

Si Tosh Sesay, ang langyaw nga student-athlete sa UC gikan sa Sierra Leone, miratsada og 20 puntos alang sa Webmasters nga nanginahanglan na lang og usa ka daog aron hingpit nang motaak sa finals.

Sila si Darell Shane Menina, Tristan Albina ug John Calvin Jabello nagkumbinar og 33 puntos alang sa Webmasters nga wala na molingi pa sukad mibulhot ngadto sa sayong labaw, 21-14.

Sila si Elmer Echavez ug Juan Miguel Gastador nagkumboya og 30 puntos apan nakawang ang ilang paningkamot kay ang Jaguars nakatilaw sa una nilang pilde sud sa duha ka duwa.

Sa laing duwa, si John Carl Escalona mipasud sa iyang buzzer-beater aron aswaton ang Cebu Institute of Technology-University (CIT-U) Wildcats ngadto sa makapaisag balahibo nga kadaogan batok sa University of Southern Philippines Foundation (USPF) Panther.

Alkansi og usa ka lugas,93-94, sa nahibiling nuybe segundos sa duwa, si Escalona mitira dayon human makadawat og pasa gikan sa inbound. Ang bola mitaop sud ring dayong kapupos sa oras hinungdan sa paglumpayat sa Wildcats ubos ni coach Edsel Say Vallena sa tumang kalipay.

Si Escalona, nga kanhi miduwa sa University of the Visayas (UV) Baby Lancers, mitapos uban ang 14 puntos. Si Jessie Aloro miratsada og 29 puntos samtang si Mark Kong miamot og 15 puntos alang sa Wildcats.

Ang torneyo nga gituyo aron pagdugang og lamas sa tinuig nga pista sa Inayawan agig pangilin sa minahal nilang patron nga si St. Augustine de Hippo karong Agosto 28 modalit og P25,000 sa makampiyon. Ang mopahiluna sa ikaduha ngadto sa ikaupat nga dapit mobulsa og P20,000, P15,000, and P10,000.

Nagpadagan sa mga duwa mao ang Cebu Basketball Referees Association (CEBRA) ubos ni league commissioner Edwin Dejacto.