Chairman's Cup Philippines 2025 USPF Panthers mituboy sa team Cebu ngadto sa titulo

CEBU, Philippines —  Ang University of Southern Philippines Foundation (USPF) Panthers mituboy Team Cebu ngadto sa korona sa Chairman's Cup Philippines 2025 niadtong Huybes, Hunyo 12, didto sa The Warehouse sa Iloilo City.

Gipalayas sa Cebu ang Capiz sa ilang trono uban ang impresibong 76-57 na kadaogan sa final aron paglugwa nga bag-ong kampiyon sa Division 1 sa tinuig nga torneyo nga gipaluyohan sa Samahang Basketbol ng Pilipinas (SBP).

Tam-is nga kalamposan ang nakab-ot sa Cebu, nga munasginhawang nakasud sa semifinals isip No.4 seed human sa eliminasyon.

Ang mga Sugbuanon nanimawos dayon sa top-ranked Negros sa Final Four sa wala pa gipaluhod ang Capiz aron silyohan ang dalaygon nilang kampanya sa lima ka adlaw nga torneyo.

Si Jack Robert Cox maoy gipasidunggan nga Finals MVP human gipangulohan ang Cebu uban ang 20 puntos, upat ka rebounds ug tulo ka assists.

Naapil sab si Cox sa Mythical Five kauban ang teammate niyang si Luke Brent Dy ug sila si Germel John Conta sa Capiz, Fred Daniel Escobio sa Cagayan de Oro ug Alfred Ysulan, Jr. sa Negros.

Ubos sa paggiya ni head coach Alan Cabatingan ug sa mga assistant coaches niyang sila si John Cabahug, Jover Elago, Nilo Adolfo ug Ronald Patindol, ang ubang mga sakop sa Team USPF-Cebu mao sila si Champ Brigoli, Sean Arradaza, Marcus Lozano, Rhelance Lacerna, Junssen Magbato, Rox Catana, Nate Adolfo, Lithel Yongco, Jeric Escaña, Jaylord Narca, Lawrence Selim, Jayhad Aguipo ug AJ Kyle de los Santos.