Folayang suko kay Alvarez sa Round 1

MANILA, Philippines — Bigong makuha ng dating ONE lightweight world champion na si Eduard Folayang ang tagumpay laban kay dating UFC lightweight world champion Eddie Alvarez Biyernes ng gabi sa Mall of Asia Arena sa Pasay.

Umabot lamang ng isang round ang laban ng dalawa bago tuluyang sumuko ang Filipino fighter mula Team Lakay.

Tumagal ng dalawang minuto at 16 na segundo ang laban bago nanaig ang Amerikano.

Ito ang kinalabasan ng bakbakan kahit na nadomina ni Folayang ang kalaban sa mga unang yugto ng match.

Sumuko si Folayang matapos mahuli sa rear-naked choke.

Dahil sa resulta, sigurado nang tutungo sa finals ng lightweight world grand prix si Alvarez.

Parehong nanggaling sa talo ang dalawa.  Nabitawan ni Folayang ang ONE lightweight title kay Shinya Aoki nitong Marso 2019 sa pamamagitan din ng submission, habang natalo naman ni Timofey Nastyukhin si Alvarez sa kanyang ONE debut match sa parehong buwan.