Castro wa'y klaro maapil sa Gilas

CEBU, Philippines – Wala pa'y seguro kon maapil ba ang veteran point guard nga si Jayson Castro sa line-up sa Gilas Pilipinas nga moduwa sa World Cup karong Agosto  didto sa China.

Mismo si Gilas coach Yeng Guiao ang miingon nga naghinay-hinay na siya og pangita'g  bag-ong  team captain tungod kay gamay ang kahigayonan nga makaduwa ang kanhi giilang 'Best Point Guard in Asia.'

Wala giklaro ni Guiao ang rason, apan giingon nga problema kini sa pamilya ug walay labot ang koponan niini.

Si Castro wala moapil sa team practice sa Gilas kagahapon didto sa Meralco gym.

Ang mga misalmot  sa unang adlaw sa training camp sa Gilas alang sa World Cup mao sila si Gabe Norwood, JuneMar Fajardo, Japeth Aguilar, Marcio Lassiter, Mark Barroca, Raymund Almazan, Roger Pogoy ug Troy Rosario.

Ang 32-anyos nga si Castro usa sa mga beterano unta sa national team diin nagsugod siya og serbisyo sa koponan niadtong tuig 2013.  Usa  usab siya nga niduwa sa   2014 World Cup didto sa Spain.