Folayang, Belingon pakyas pagdepensa sa ilang bakus

CEBU, Philippines —  Pulos nahuboan sa tagsa-tagsa nila ka kalibotanong bakus sila si Eduard Folayang ug Kevin Belingon human nangapilde batok sa langyaw'ng nilang kaatbang sa ONE Championship fight card sa miaging gabii didto sa Tokyo, Japan.

Ang Pinoy mixed martial arts  legend  nga si Folayang wala makapanalipod sa iyang world lightweight title dihang gituok ug gipakatug siya sa Hapon nga si Shinya Aoki sa first round. Ang maong sangka usa ka 'rematch' sa duha dihang si Folayang mikulata ni Aoki duha ka tuig ang milabay didto sa Singapore.

Sa usa sa mga supporting main event, nahanaw sab sa mga kamot ni Belingon ang iyang bantamweight title human siya mapilde pinaagi sa disqualification batok sa Brazilian nga si Bibiano Fernandes.

Nindot unta ang gipakita ni Belingon dihang gipauwanan niya og mga kumo ug patid si Fernandes, apan wala niya tuyoa nga maigo ang luyo nga bahin sa ulo sa Brazilian nga nalup-og. Gidili sa MMA ang pag-igo sa maong dapit tungod sa grabeng kadaot nga mahimo niini.

Gilauman nga adunay 'rematch' nga mahitabo nilang duha. 

Sayo ning tuiga, nahuboan sa ilang mga bakus sila si strawweight Joshua Pacio ug flyweight Geje Eustaquio. 

Ang heavyweight Fil-American nga si Brandon Vera mao na lang ang nagpabiling Pinoy world champion sa MMA.