Cebu School of Chess mohimo' og Summer Camp

CEBU, Philippines — Ang mga Sugboanong magduduwa og ahedres makahigayon pagbaid og maayo sa ilang abilidad pinaagi sa Cebu School of Chess Summer Camp 2019 nga gikatakda karong Abril 1 ngadto sa Mayo 30 diha sa Cebu Coliseum.

Abli ang duha ka bulan nga kalihukan sa mga babaye ug lalaking players, bata man o tigulang, pasiugdahan   ni Grandmaster candidate Kim Steven Yap.

"I am doing this not only to train kids but also for them to become responsible scholars and future leaders of the society through the values they get out of playing chess," matud pa ni Yap.

Usa sa labing ngilngig nga produkto sa Cebu chess, si Yap maoy nagtukod sa Cebu School of Chess niadtong 2014.

Iyang naangkon ang labing una niyang GM norm human siya mitapos sa ikaduhang dapit sa Berkeley Chess School 2018 Summer IM/GM Norm Tournament didto sa Berkeley, California. 

Si Yap nga kanhi nagsilbe nga trainer sa ASEAN Chess Academy didto sa Singapore, maoy kasamtangang coach ug trainer sa University of Cebu (UC) chess varsity team.

Sa umaabot niyang summer clinic, si Yap mitanyag og package nga P4,500 sa tibuok camp, P2,800 sud sa usa ka bulan, P750 sud sa usa ka semana ug P180 sud sa usa ka adlaw. 

Mopabayad siya og P2,200 niadtong magpa-train matag Sabado lamang.

Alang sa dugang mga detalye, mahimong mokontak sa 0977-6864660.