Henry Agbon, Fury Trazona nagmangtas dayon sa CLBA 2
CEBU, Philippines — Duha ka dagkong haligi sa Consolacion Lilo-an Basketball Association nga sila si Henry Agbon ug Fury Trazona ang mihimo dayon og kasikad pagsugod sa CLBA Season 2 basketball tournament niadtong Sabado sa gabii didto sa GT Academy gym sa Tayud lungsod sa Lilo-an.
Ang ballclub president nga si Agbon wala kapugngi sa iyang pagmangtas diin mikadlit siya og 20 puntos aron mangulo sa iyang team J&J Surplus pag-ipsot batok sa Nazarene ni Jed Balaod, 93-91, samtang ang league commissioner nga si Trazona mao sab ang nangu sa koponan niyang E&F Surplus paglubong sa Forwarders ni Genesis Pepito, 101-53 pinaagi sa iyang 16 puntos.
Nagtabla ang iskor, 91-all sa daginutong oras sa duwa ug magka-overtime unta kini, apan si Romnick dela Rama mihimo og milagro dihang iyang napasulod ang mahinungdanon niyang itsa sa nahibiling 1.4 segundos nga naghimo niyang bayani sa J&J Surplus. Si Dela Rama mitampo og 16 puntos.
Sa laing bahin, ang E&F Surplus dominante kaayo sa maong duwa ug ila nga gilubong ang Forwarders og 27 puntos sa halftime, 50-23. Miburot pa ang labaw ug samtang nagkagamay ang oras, nagkadako sab ang ilang labaw.
Sila si Apyak Sabang ug Kokoy Sabang nagkumbinar og 25 puntos sa E&F Surplus.
Midaog sab ang PhilCement, apan miagi pa kini og overtime una nila mapilde ang Princess Shaira ni Rommel Bucatan.
Si Manolito Dejarme mikabkab og 21 puntos, samtang ang team manager niining si Bobong Tiongson mikandos og 20 puntos alang sa PhilCement nga nakasungasong gikan sa mga kalisdanan.
Ang team manager sa Princess Shaira nga si Rommel Bucatan mao sab ang nangu sa napildeng koponan nga miratsada og 20 puntos.
Ang liga namugna pinaagi sa panag-tambayayong sa presidente niining si Arnold Labustro ug bise presidente Henry Agbon.
Gipaluyohan sa Union Galvasteel ug sa J&J Surplus, ang liga giduma ni commissioner Fury Trazona.
Puntos Matag Usa
Unang duwa:
J&J Surplus (93) – Agbon 20, Cabahug 17, Dela Rama 16, Tiwan 11, Adolfo 7, Oroyan 6, Casper 6, Romaguera 3.
NAZARENE (91) – Manatad 25, Basanez 22, Dublin 20, Marquez 4, Precillas 2, Misoles 2, Sinugbuhan 2.
Ikaduhang duwa:
E&F Surplus (101) – Trazona 16, A. Sabang 13, K. Sabang 12, Ponce 12, Pepito 11, Igoy 8, Ursal 6, Betinol 6, Caballes 3.
FORWADERS (53) – Cruz 10, Longakit 5, Pepito 5, Cañete 5, Banglos 4, Balbuena 2, Tamparong 2.
Ikatulong duwa:
PHILCEMENT (97) – Dejarme 21, Tiongson 20, Escobido 13, Gestopa 11, Mantos 11, Mantos 9.
PRINCESS Shaira (94) – Bucatan 20, Gitgano 16, Toring 14, Ylanan 14, Suico 13, Gamao 12, Jayag 5. (BANAT NEWS)
- Latest
