Nietes batok ioka alang sa WBO super fly title

CEBU, Philippines — Ang pambato sa ALA Gym nga si Donnie 'Ahas' Nietes makigharong ni   Kazuto Ioka sa Japan  sa  gubat  sa duha ka three-division  world champions  alang sa bakanteng World Boxing Organization (WBO) super flyweight title karong Disyembre 31 didto sa Macau, China.

Segun sa taho  ni Dong Secuya sa Philboxing.com, ang maong away gi-aprobahan sa  WBO Executive Committee atol sa ikalima ug katapusang adlaw sa 31st WBO Annual Convention kagahapon didto sa El Panama Hotel sa Panama.

  "In principle, the fight is a done deal. We just have to sign contracts to seal it,"  sumala pa ni ALA Promotions President ug CEO Michael Aldeguer, ang promoter ni Nietes.

Ang 36-anyos nga si Nietes nga maoy No. 1 super flyweight contender sa WBO, nakigbinukbukay sa iyang kababayan nga si  Aston Palicte niadtong Septiyembre 8 didto sa The Forum sa Inglewood, California, apan gitabla ang ilang away hinungdan nga nagpabiling bakante ang titulo

Sa susamang card, miaway sab si Ioka diin gikulata niini si two-time world title challenger McWilliams Arroyo sa Puerto Rico aron modaog pinaagi sa unanimous decision. 

Ang kampo ni Palicte gusto unta nga makig-rematch ni Nietes, apan si WBO President Francisco 'Paco' Valcarcel nimando nga papangitaon una siya og laing kontra ug kun modaog hayan siya makaangkon og katungod nga maoy mohagit sunod sa modaog sa sangka tali nilang Nietes ug Ioka.

Si Nietes, lumad gikan sa Murcia, Negros Occidental, dunay 41-1-5 record uban ang 23KOs, samtang si Ioka kausa pa sab mapilde sa 24 ka sangka uban ang 13KOs.