Criztian Pitt asam ang Finals vs Uzbek
MANILA, Philippines — Puntirya ni Children of Asia gold medalist Criztian Pitt Laurente na makasungkit ng silya sa championship round sa pagsambulat ng semifinals sa men’s bantamweight (56 kg.) division ng prestihiyosong 2018 AIBA Youth Men’s and Women’s World Championships ginaganap sa Duna Arena sa Budapest, Hungary.
Subalit daraan sa butas ng karayon si Laurente sa semis.
Makakasagupa nito si Abdumalik Khalokov ng Uzbekistan na galing sa second-round referee-stopped-contest kay Laion Martinelle Duraes Souza ng Brazil.
Hindi naman ito aatrasan ni Laurente na desididong makapag-uwi ng gintong medalya matapos mapatalsik sa kontensiyon ang tatlo pang miyembro ng national junior team kabilang na ang kanyang kapatid na si Criz Russu Laurente.
Umabante sa semis si Criztian Pitt matapos magtala ng 4-1 unanimous decision win laban kay Sanzhai Seidekmatov ng Kyrgyzstan sa first round kasunod ang 4-0 unanimous decision win kontra naman kay Akash Kumar ng India sa second round.
Pinataob din ni Criztian Pitt si Asian Youth Championship quarterfinalist Daniyal Shahbakshsh ng Iran sa quarterfinals via 4-1 unanimous decision sa torneong nilahukan ng mahigit 50 bansa.
- Latest
