Erediano, Borja nanghawod sa ilang dibisyon sa 2018 Alaska Ironkids

CEBU, Philippines — Ang Cebuana junior triathlete nga si Moira Frances Erediano ug ang bisita gikan sa Laguna nga si Zedrick Borja maoy  nidominar   sa  2018 Alaska Ironkids kagahapon didto sa Shangri-La Mactan Resort and Spa sa Lapu-Lapu City.

Si Erediano mitapos sa swim-bike-run event sa oras nga 41:12.7, gisundan ni Nicole Marie del Rosario (42:01.1) ug Jeanna Mariel Cañete (43:11.4) alang sa silver ug bronze medal.

Sa boys premier,  si Borja misakmit sa kulbahinam nga daog batok ni Clifford Pusing sa Olongapo. Si Borja kinahanglan pa nga makigginukdanay ni Pusing paingon sa finish line aron makuha ang bulawan.

Mirehistro siya og oras nga 38:24.0,  una lang og siyete segundos batok ni Pusing. Si Earol Belonguil maoy bronze medalist human niya gitapos ang lumba sa oras nga 39:49.5

Lain pang mga mananaog mao sila si Justin Hermosa (34:49.2) ug Kira Ellis (38:02.2) sa 11-12 class, Carron Paulter Canas (27:48.5) ug Zurielle Kenzie Galo (30:29.0) sa 9-10 ug Kenshie Luke Cabando (18:52.7) ug Christy Ann Perez (21:51.1) sa 6-8 category.