LeBron misaad agakon ang Lakers

CEBU, Philippines — Mipadayag si NBA superstar  LeBron  James  nga naglantaw siya ngadto sa dakong hagit nga agakon ang Los Angeles Lakers nga nagtingkagol karon sa labing bati nilang lima ka tuig nga salida sa kasaysayan sa ilang prangkisa.

Mao kini ang gipabuhagay ni James sa labing una niyang komento sa publiko sukad siya mibiya sa Cleveland Cavaliers aron motapon sa Lakers.

Bisan og gilabhan na sab siya sa iyang mga kritiko ilabi na niadtong nakadisgusto kaniya, si James miinsister nga nindot ang gihimo niyang lakang pagbalhin sa Lakers dili lamang alang sa iyang kaugalingon ug sa iyang pamilya, apan hasta sab sa kasaysayan sa basketbol.

Ang 33-anyos nga si James gikatakda nga mosud sa ika-16 niyang season sa NBA. Nakadaog siya og tulo ka kampiyonato ug nakataak sa Finals sud sa walo ka sagunson nga higayon ug ikasiyam sa kinatibuk-an.

Sa miaging bulan, si James miuyon ngadto sa upat ka tuig nga kontrata nga mibalor og $154 million uban sa Lakers. Iyang gibiyaan ang Cavs sa ikaduhang higayon human kini niya gigiyahan ngadto sa upat ka sunod-sunod nga pagtikang sa NBA Finals. Niadtong 2016, iyang gitunolan ang Cavs sa labing una niining korona sa NBA.

Sama sa iyang gibuhat sa Cavs, malaumon si James nga iya sab madalitan og titulo ang Lakers. Mao kini ang nag-unang rason nganong nakahukom siya nga motaak sa Hollywood.

Ang Lakers nagkupot og 35-47 record sa miaging season ug wala na makasud pa sa playoffs sukad niadtong 2013. Mao kini ang labing lawom niyang pagkaunlod sukad sila mikolekta og 16 ka kampiyonato.

Misulbong ang pagsalig ni James nga makab-ot niya ang iyang misyon nunot sa pagkuha sa Lakers nilang Lance Stephenson, JaVale McGee, (Michael Beasley) ug Rajon Rondo aron iyang makatumpang.

"So we look forward to all the challenges," matud pa ni James nga mi-average og 27.2 points, 7.4 rebounds ug 7.2 assists sud sa 1,143 ka regular season games sa 15 ka tuig niyang karera uban sa Cavs ug Miami Heat.