LABA semis karong gabii
CEBU, Philippines — Pareho og tinguha nga makasulod sa finals, seguradong hugot ug kulbahinam nga duwa ang gilauman sa upat ka teams sa semifinals sa LABA Basketball Tournament 2018 karong gabii diha sa Co Tiao King gym, dakbayan sa Mandaue.
Ang no. 1 nga Friends ug no. 2 AC Troopers nga pulos naglaraw mosakmit og luna sa finals batok sa tagsa-tagsa nilang kaatbang.
Ang Friends makigsangka sa Sebandal sa alas-7 sa gabii, samtang ang AC Troopers moharong sa Monterroyo/Jordan sa alas-8:30 sa gabii.
Bisan sila ang defending champion, ang Friends dili angay mokompiyansa kay gawas nga hait og hinagiban, gibitoonan sab og twin-tower nga sila si Tawing Grafe ug Canjo Echavez.
Aron matuman ug moabante'g balik sa finals, ang Friends kinahanglan mopakita og maayong labok ilabi na nilang Raul Mahusay, Dindo Aligway, Jong Cabonilas ug 3-point artist Geryl Bukiron.
Sa laing bahin, ang AC Troopers ni S/Insp. Dondon Coloscos makasugat og lisud nga duwa batok sa Monterroyo/Co-Jordan.
Salig hinuon si Coloscos sa iyang katropa sama nilang Rex Gonzaga, Timmy Cabrera, Opong Englis ug Lloyd Chavez.
Ang Monterroyo/Co-Jordan nilang Dr. Raul Monterroyo ug Richard Jordan magsalig gihapon sa higante nilang si Michael Tañan. Gawas ni Tañan, ang Monterroyo/Co-Jordan makalaum sab nilang Marlon Mendoza, Richard Jordan, Daniel Catinoy, Noel Ferolino ug Clemente Pelit.
Ang liga nga namugna pinaagi ni S/Insp. Dondon Coloscos, gipaluyohan sa Bol-anon Eatery. (BANAT NEWS)
- Latest
