Dul-an 300 mosalmot sa Gullas Tennis Cup
CEBU, Philippines – Nakahakot og rekord nga dul-an sa 300 ka mga entrante ang 23rd JRG Gullas Tennis Cup nga gikatakda karong Hunyo 1-5 diha sa CitiGreen Tennis Resort ug Alta Vista Golf and Country Club tennis courts.
Dungan niini, si Jose 'Dodong' R. Gullas nga maoy nagmugna ning tinuig nga torneyo niadtong tuig 1995 mipasalig sa padayon niyang suporta, apan iyang gitugyan ang tanan sa Kahista-an.
“Only God knows. Atong timbang-timbangon ta ni kun asa ni taman,” matud pa ni Gullas.
Sa iyang bahin, si John Z. Pages nga maoy katambayayong ni Gullas sa pagtukod sa labing taas ug labing dako nga tennis event gawas sa Metro Manila nagkanayon nga ang gidaghanon sa mga entrante resulta sa pagkasaka sa Gullas Cup ngadto sa usa ka Group 1 event ubos sa Unified Tennis Philippines.
Sa pagka karon, kapin na sa 250 ang nagparehistro, apan si tournament director Fritz Tabura mipadayag nga moburot pa ang maong numero ilabi na kay ilang giinat ang rehistrasyon hangtod karong alas-12 sa udto.
Sama sa miaging mga edisyon, siyam gihapon ka kategoriya ang tigian ug kini mao ang mixed 10-under ug boy/girls 12, 14, 16 ug 18-under. Duna say doubles event sa 10, 14 ug 18-under age groups.
- Latest
