BanKo Perlas, Tacloban iisa ang misyon

MANILA, Philippines — Mag-uunahan ang BanKo Perlas at Tacloban na makuha ang ikalawang panalo sa kanilang paghaharap ngayong araw sa Premier Volleyball League Season 2 Reinforced Conference sa The Arena sa San Juan City.

Magtatagpo ang Perlas Spikers at Fighting Warays sa alas-6:30 ng gabi habang lalarga naman ang salpukan ng BaliPure at Petro Gazz sa alas-4 ng hapon.

Tangan ang parehong 1-1 baraha, ang mana­nalo sa pagitan ng Perlas Spikers at Fighting Warays ay uusad sa unahan ng stan­dings kasalo ang Creamline Cool Smashers at PayMaya High Flyers na may magkatulad na 2-1 marka.

Matapos lumasap ng kabiguan sa kamay ng PayMaya, nakabawi ang Fighting Warays  nang payukuin nila ang Petro Gazz Angels noong Mayo 9.

Taliwas naman ang nangyari sa Perlas Spikers.

Naitala ng BanKo ang impresibong come-from-behind five-set win laban sa Creamline noong Sabado ngunit yumuko ang tropa sa nagdedepensang Pocari-Air Force noong Linggo sa larong parehong ginanap sa Tuguegarao.

Sa men’s dvision, susubukan ng Vice Co na kubrahin ang ikalawang sunod na panalo sa pagharap sa Cignal sa alas-10 ng umaga habang magtutuos naman ang PLDT at Instituto Estetico Manila sa alas-12 ng tanghali.