Limasawa pabiling wa’y pilde sa Triple-A

CEBU, Philippines — Nagkumboya'g 23 puntos sila si Eman Pacquiao ug Reyden Villaronza aron mangu sa  opensiba sa Limasawa nga midaog batok sa Explorer, 59-52 sa gubat sa mga wa'y pildeng koponan sa nagpadayong aksiyon sa Triple-A President's Cup 2018 basketball tournament niadtong Domingo didto sa Kimwa gym sa Barangay Subangdaku, dakbayan sa Mandaue.

Si Pacquiao mitikdol og 13 puntos, samtang si Villaronza mitimang og 10 puntos sa Limasawa nga nag-una gihapon sa standing uban ang 3-0 nga baraha.

Naggukod pirme ang Limasawa, apan human nila mailog ang labaw, 30-28, wala na kini molingi pa hangtod nahurot ang oras sa duwa.

Bugtong si Rechel Bamba lang ang miiskor og double figures sa 2-1 Explorer nga mikamada og 15 puntos.

Sa pasiunang duwa, ang AC Troopers mikulit sa ilang ikaduhang sunod-sunod nga daog pinaagi sa pagpilde sa   Monterroyo sa iskor nga 70-60.

Hayag na unta ang kadaogan sa AC Troopers dihang miabante sila og 21 puntos sa halftime,  54-33, apan kalit kining natabonan sa kangitngit dihang milusad og 16-0 run ang Monterroyo ubos sa giya ni Mendoza aron matipakan ang labaw ngadto na lang sa sayes puntos sa third period, 48-54.

Gawas sa balanse nilang ataki, solido sab kaayo ang depensa sa Monterroyo hinungdan nga ilang nalimitahan  ang AC Troopers ngadto sa kuwatro puntos sa tibuok third  quarter.

Gibuak sa beteranong si Boy Yares ang kabugnaw sa AC Troopers sa nahibiling 1:25 ug nasundan sa itsa ni Opong Englis.

Misikit pa ang undermanned nga Monterroyo ni playing team manager Dr. Raul Monterroyo, 58-61, apan didto ra kutob ang ilang maayong labok kay wala makalahutay ang ilang kusog.

Si Florentino Ecot maoy nangu sa AC Troopers nga mikadlit og 11 puntos, lakip na ang tulo ka tres, gisundan ni team manager S/Insp. Dondon Coloscos nga mipabuto og 10 puntos.

Gipangulohan sab ni Marlon Mendoza ang Monterroyo nga miburak og 20 puntos, samtang si Jerry Jacalan mitampo'g 13 puntos.

Bisan pa sa maong kapildihan, ang Monterroyo nga aduna la'y unom ka players niduwa, angay gihapon nga daygon kay gihatagan nila og maayo nga duwa ang AC Troopers.

Ubos sa bendisyon ni ballclub president Alan Buenavista ug vice president Dodong Lurica, ang mga duwa gipadagan ni league commissioner Geryl Bukiron sa abag nilang Ramil Baclay, Orly Navarro ug Lahug Brgy. Capt. Dodong Taborada.

Puntos Matag Usa

Unang duwa:

AC TROOPERS (70)  – Ecot 11, Coloscos 10, Mahusay 8, Oquias 7, Ferolino 6, Yares 6, Cabahug 4, Ocier 4, Englis 2, Pestaño 2.

MONTERROYO (60) – Mendoza 20, Jacalan 13, Keith 9, Monterroyo 8, Cabucos 8.

Ikaduhang duwa:

LIMASAWA (59) – Pacquiao 13, Villaronza 10, Flores 9, Palero 6, Monterde 6, Solana 5, Monternel 4, Tayag 2, Cabrera 2, Gonzaga 1.

EXPLORER (52) – Bamba 15, Suson 9, Gorgonio 6, Chavez 6, Ouano 4, Medillo 4, Garcia 2, Jacalan 2, Apet 2, Buenavista. (BANAT NEWS)