UST inangkin ang general championship

MANILA, Philippines — Muling napasakamay ng University of Santo Tomas ang general cham­pion^­ship title matapos ma­kalikom ng kabuuang 283 pun­tos sa pagtatapos ng UAAP Season 80.

Ito ang ika-42 korona ng España-based school kung saan anim na korona ang naibulsa ng tropa kabilang na ang sweep sa men at women’s crowns sa judo competition.

Nangibabaw din ang UST sa women’s beach vol­leyball, women’s tennis, women’s athletics at poomsae, habang nakahirit pa ang mga tigre ng pitong runner-up trophies at tatlong third-place finishes.

Sumegunda ang De La Salle University na may nakuhang 269 puntos tampok ang limang titulo, limang se­cond-place at anim na third-place.

Sariwa pa ang La Salle sa matamis na pagkopo ng ‘three-peat’ sa women’s volleyball at nakuha rin nito ang unang puwesto sa wo­men’s chess, women’s table tennis, women’s badminton at women’s football.

Nasa ikatlo ang University of the Philippines na may 234 puntos na may isang ginto, limang pilak at pitong tanso at ikaapat ang Ateneo de Manila University na may 230 pun­tos mula sa apat na gin­to, apat na pilak at apat na tanso

Nagtapos sa ikalima ang National University (179) kasunod ang Univer­si­ty of the East (168), Far Eas­­tern University (151) at Adamson University (101).