Warriors mibihag sa Hawks

CEBU, Philippines - Ang off-balance   three-pointer  ni Draymond Green atol sa pagkapupos sa shot clock sa nahabiling 40.2 segundos sa overtime maoy nagsalbar sa Golden State Warriors  batok sa  Atlanta Hawks, 109-105 sa  NBA kagahapon didto sa Oracle Arena sa Oakland, California.

Wala makaduwa si Stephen Curry, kinsa mitan-aw na lang tungod sa piang sa wa’ng tikod. Wala sab makaduwa si Andre Iguodala kagahapon tungod kay may gipamati siya nga paghugot sa iyang hamstring.

Nakuha ni Andrew Bogut ang bola nga hapit na unta mogawas sa linya ug nasawo kini ni Green dayong itsa  aron dili maabtan sa depensa ni Kent Bazemore nga gusto untang moilog sa bola.

Si Klay Thompson mihimo og  go-ahead 3-pointer sa nahabiling  2:54   ug laing krusyal nga basket sa nahabiling 11.4 sa overtime alang sa iyang 26 puntos aron pangulohan ang Warriors.

Ang Warriors midaog na sa ilang ikaduhang sunod-sunod  nga overtime game aron makuha ang franchise-best nga 43 ka sagunson nga regular-season home victory ug maoy ilang ika-25 nga sunod-sunod nga daog karon nga  season.  

Ang Warriors nga adunay 54-5 nga baraha, posibleng motabla sa rekord sa Chicago Bulls nga  44  ka duwa nga walay pilde sa ilang homecourt gikan sa Marso 30, 1995 ngadto na sa Abril 4, 1996 dihang ang Golden State mo-host batok sa  Oklahoma City Thunder ugmang adlawa.

Suwayan sab sa Warriors pagbuak sa rekord sa 1995-1996 Bulls nga 72-10 sa regular season.

Ang Warriors kinsa midaog na sa ilang sagunson nga unom ka duwa, aduna na’y 5-0 record sa OT ug wala na mapilde didto sa Oracle Arena sukad nahiagum sila’g 113-111 nga kapildihan sa Bulls niadtong Enero 27, 2015.

Si Paul Millsap misipyat sa iyang three-point attempt sa nahabiling 24 segundos sa regulasyon ug  misipyat sab  sa ilang tagsa-tagsa ka pagsuway silang Thompson ug Bogut sa ila untang potential winning shots sa himalatyong segundos.

Si Millsap  miiskor og 19 puntos alang sa  Hawks nga mi-rally gikan sa 14 puntos nga biya sa wala pa sila hingpit nga napilde diin aduna na sila'y 0-4 record sa overtime karon nga season. 

Ang reigning NBA MVP nga si Curry  gipapahuway lang una kay mihubag ang  wa’ng tikod nga iyang naangkon didto sa Oklahoma City niadtong Sabado diin ang iyang winning three-pointer sa overtime maoy naghatag sa Warriors og 121-118 nga kadaugan batok sa Thunder.

Sa iya karon nga ikatulong sagunson nga 40-point games, si Curry maoy napiling Western Conference Player of the Week. (BANAT NEWS)