La Salle, UP target ang 2-0 record
Laro Ngayon
(Philsports Arena)
8 a.m. – AdU
vs UE (Men)
10 a.m. – FEU
vs Ateneo (Men)
2 p.m. – UP
vs DLSU (Women)
4 p.m. – NU
vs AdU (Women)
MANILA, Philippines – Mag-uunahan ang University of the Philippines at De La Salle University na makuha ang ikalawang sunod na panalo sa kanilang paghaharap ngayong hapon sa UAAP Season 78 women’s volleyball tournament sa Philsports Arena sa Pasig City.
Magpapang-abot ang Lady Maroons at Lady Spikers sa alas-2 ng hapon, habang aarangkada rin ang bakbakan ng Adamson University at National University sa alas-4 ng hapon.
Nakatali sa four-way tie ang UP, La Salle, Adamson at defending champion Ateneo de Manila University sa unahan ng team standings matapos kubrahin ang kani-kanilang unang panalo (1-0).
Maganda ang naging simula ng UP nang patumbahin nito ang University of the East sa bisa ng 25-20, 25-13, 25-21 panalo.
Sina Nicole Tiamzon, Kathy Bersola at Marian Buitre ang pangunahing pinagkukunan ng lakas ng Lady Maroons kasama ang matitikas na rookies na sina Isa Molde, Justine Dorog at Diana Carlos.
Ngunit masusubukan ang tunay na lakas ng Lady Maroons sa pagharap nito laban sa Lady Spikers na isa sa mga pinakasolidong lineup sa taong ito.
“Against La Salle, hindi puwede kaming maraming service errors and we have to execute well,” ani Lady Maroons’ coach Jerry Yee.
Galing din ang La Salle sa 29-27, 25-23, 25-20 panalo kontra Far Eastern University noong Miyerkules kung saan nasilayan ang pagbabalik-aksyon ni dating UAAP MVP Ara Galang.
Bagama’t ingat sa kanyang pagtalon, nagawa pa rin ni Galang na makapaglista ng 10 puntos kasama ang 5 digs.
- Latest
