Thompson bida sa 5-dikit ng Warriors
PORTLAND, Ore. – Humataw si Klay Thompson ng 36 points, tampok dito ang pitong 3-pointers, para banderahan ang nagdedepensang Golden State Warriors sa 128-108 panalo laban sa Portland Trail Blazers.
Ito ang pang-limang sunod na ratsada ng Warriors.
Nagdagdag si reigning league MVP Stephen Curry ng 26 points at 9 assists sa loob ng tatlong quarters para sa Warriors (34-2) na lumamang ng 25 points at nagsalpak ng kabuuang 18 triples.
Tumapos naman si Draymond Green na may 11 points, 13 rebounds at 10 assists para sa kanyang pang-walong triple-double sa season.
Hindi pa natatalo ang Warriors simula nang malasap ang 91-114 kabiguan sa Dallas Mavericks noong Dec. 30.
Naglaro si Curry na may bruised left shin na nagpaupo sa kanya sa dalawang laro noong nakaraang buwan.
Lumala ang kanyang injury nang makabanggaan si Roy Hibbert noong Martes at hindi na nakalaro sa fourth quarter sa 109-98 panalo ng Warriors sa Los Angeles Lakers.
Nagtala naman si Damian Lillard ng season-high 40 points at 10 assists sa panig ng Portland, nalasap ang kanilang ikatlong sunod na kamalasan.
Sa iba pang laro, tinakasan ng San Antonio Spurs ang New York Knicks, 100-99; tinalo ng Toronto Raptors ang Washington Wizards, 97-88; dinaig ng Orlando Magic ang Brooklyn Nets, 83-77; pinatumba ng Memphis Grizzlies ang Denver Nuggets, 91-84; giniba ng Cleveland Cavaliers ang Minnesota Timberwolves, 125-99; binigo ng Indiana Pacers ang New Orleans Pelicans, 91-86; pinabagsak ng Miami Heat ang Phoenix Suns, 103-95; nilusutan ng Milwaukee Bucks ang Dallas Mavericks, 96-95 at hiniya ng Oklahoma City Thunder ang Los Angeles Lakers, 117-113.
- Latest
