Mga Sugbuanon padayong mikabkab og bulawan paGtak-op sa Batang Pinoy
CEBU, Philippines - Ang Sugbuanong netter nga si Elizabeth Abarquez milangkat og duha ka bulawang medalya sa lawn tennis event sa 2015 Philippine National Youth Games-Batang Pinoy National Championships kagahapon didto sa CitiGreen Tennis Resort sa Barangay Punta Princesa, dakbayan sa Sugbo.
Ang garbo sa dakbayan sa Carcar mipukan ni Yana De Asis sa La Carlota City, 7-6, 6-4, aron pagdaog og gold sa singles event. Nakamina sab siya og laing bulawan sa girls doubles competition uban ni Zethley Mae Alferez.
Si Francis Hidalgo, nga kauban ni Abarquez sa University of the Visayas varsity team ug si Mark Suson sa University of Cebu mitunol sa ikatulong tennis gold sa TCC pinaagi sa boys doubles.
Sa arnis nga gibanatan didto sa Mandaue City Sports and Cultural Complex, ang pambato sa TCC nakakuha og tagsa ka gold, silver ug bronze. Si Nicole Angeli Tamayo mibira sa nag-inusarang gold sa TCC ubos sa flyweight division sa full contact.
Naka-gold sab ang TCC sa 3-on-3 basketball kortesiya sa University of San Carlos Baby Warriors.
Sa futsal, ang TCC pinaagi sa Don Bosco Technology Center maoy naka-gold sa boys division, samtang ang Mandaue nga girepresentahan sa Sacred Heart School-Ateneo de Cebu maoy milabni og gold sa girls division
Ang managsuong Caasi nga sila si Chriszelle Anne ug Anne Krizzia misakmit og gold sa Cebu Province sa girls beach volley.
Sa taekwondo, si flyweight Wendil Jay Rama maoy mikuha sa bugtong gold sa Sugbo, samtang sila si lightweight Dineson Wirej Caneda ug finweight Arwen Sorrosa naka-silver. (BANAT NEWS)
- Latest
