Lady Troopers pumuwesto na sa semis
Laro sa Nov. 7 (The Arena, San Juan City)
12:45 p.m. PLDT Home Ultera vs Navy
MANILA, Philippines – Nagpatuloy ang magandang laro ng Army Lady Troopers para angkinin ang unang puwesto sa semifinals sa pamamagitan ng 25-14, 25-17, 25-14 panalo laban sa Navy Lady Sailors sa Shakey’s V-League Season 12 Reinforced Conference noong Sabado ng gabi sa The Arena sa San Juan City.
Si Jovelyn Gonzaga ay mayroong 15 puntos sa 10 kills, tatlong blocks at dalawang aces, bukod pa sa 10 excellent digs para suportahan ang 13 kills, apat na aces at isang block tungo sa 18 puntos ni Honey Royse Tubino.
Kontrolado ng Lady Troopers ang kabuuan ng laro at nanguna sila sa attacks, 38-24, blocks, 8-1 at serve 8-0.
Ito na ang ikatlong sunod na panalo ng Army at umabante na sila sa semifinals sa ligang inorganisa ng Sports Vision katuwang ang Shakey’s at handog ng PLDT Home Ultera dahil ang Coast Guard Lady Dolphins at Kia Forte, na nasa ikalima at anim na puwesto, ay hanggang dalawang panalo lamang ang pinakamagandang pagtatapos na maililista sa liga.
Bumaba sa 2-2 karta ang Navy at walang ningning ang naipakitang laro ng Lady Sailors para malagay sa ikaapat na puwesto sa anim na koponang liga.
- Latest
