AC Troopers nag-una na sa laba President’s Cup

MANILA, Philippines – Nailog na sa AC Troopers ang solong liderato human ilang gimasaker ang Top V, 57-46 sa nagkainit nga aksiyon sa LABA President’s Cup 2015 basketball tournament niadtong Biyernes sa gabii didto sa Banilad Sports Center, dakbayan sa Mandaue.

Ang AC Troopers ni SPO4 Dondon Coloscos nagtangkil na karon og 6-1 nga baraha.

Gipangulohan ni Jerry Jacalan ang AC Troopers nga mirakrak og 15 puntos, apan ang nagdala og bida sa kadaugan mao silang Coloscos, Pedot Dakay, Opong English ug Joel Cabahug nga nakigbisog og maayo ilabi na sa fourth quarter aron mapukan ang mas lig-on nga Top V nga kompleto sa hinagiban.

Human molabaw sa halftime, 25-19, ang AC Troopers wa’y puas nga mirumbo sa Top V aron  mabingat ang ilang labaw ngadto sa 13 puntos, 44-31 nga maoy miabli sa pultahan sa kadaugan.

Si Englis mibunlot og 11 puntos, si Dakay mikadlit og 10 puntos, samtang sila si Coloscos ug Cabahug nagkumbinar og 11 puntos.

Ang three point artist  nga si Geryl Bukiron mao lang ang nakaiskor og double figures alang sa Top V sa iyang 14 puntos. Ang katimbang niya  nga si Dodoy Rizane, kinsa moiskor sab og double digits matag duwa gilimitahan lang sa sayes puntos. Ang Top V nalabay karon sa ikaduhang dapit sa ilang 6-2 nga baraha.

Sa pasiunang duwa, ang Lesjorcin miugkat na sab og laing daog, ning higayona batok sa Luigi-Sebandal, 75-65.

Miburak si Barak Recto og 28 puntos aron pangulohan ang Lesjorcin, samtang si Richard Jordan mibahog og 23 puntos. Wala kaarte si Lloyd Chavez diin igo lang siya mitali og otso puntos, apan iyang tulo ka assists ngadto kang Richard Limosnero nakatabang og daku pag-inat sa ilang labaw.

Si Eman Pacquiao mao lang ang misalida og maayo sa Luigi-Sebandal nga miantog og 20 puntos. 

Ang liga gipasiugdahan sa Los Amigos Basketball Association ubos sa ilang presidente nga si konsehal Gilbert Sebandal. Ang mga duwa gipadagan ni league commissioner Geryl Bukiron inabagan nilang Lloyd Chavez, Ramil Baclay ug Allan Recla ug ingon man nilang Chang Tejero, Henry Fontanosa, Arjan Wenceslao ug Glenn Oppos.  (BANAT NEWS)

PUNTOS MATAG USA

Unang duwa:

LESJORCIN (75) – Recto 28, Jordan 23, Chavez 8, Limosnero 8, Lara 7, Evangelista 6, Cinco 3.

LUIGI-SEBANDAL (65) – Pacquiao 20, Ubas 9, Buliag 8, Rogado 8, Sebandal 6, Rabanal 6, Duhaylungsod 4, Incorporado 4.

Ikaduhang duwa:

AC TROOPERS (57) – Jacalan 15, Englis 11, Dakay 10, Coloscos 6, Cabahug 5, Migallen 4, Balo 3, Beldera 2, Cornejo 2.

TOP V (46) – Bukiron 14, Puerto 8, Rizane 6, Echavez 5, Gelbolingo 5, Milana 4, Alcover 2, Colanse 2.