Top V nagsolo na’s standing sa Laba President’s Cup
CEBU, Philippines - Nihaum sa ngan sa ilang team nga Top V dihang pabilin gihapon kining nag-una sa standing sa second conference sa Los Amigos Basketball Association (LABA) President’s Cup 2015.
Ang Top V mirehistro og 6-1 win-loss record human sa ilang kulbahinam nga duwa batok sa Lakers niadtong Lunes didto sa Banilad Sports Center, Mandaue City.
Ang kombinasyon nilang Dodoy Rizane ug Geryl Bukiron maoy mibaswat sa kutas nga kadaugan sa Top V.
Si Rizane, kinsa maoy miiskor sa tanang 10 puntos sa Top V sa first period miposa’g 20 puntos, samtang si Bukiron miamot og 19 puntos.
Biya pirme ang Top V gikan sa pagsugod hangtod nga nakatabla, 54-all sa nahabiling 5:54 sa fourth quarter sa itsa ni Bukiron.
Naglami ang duwa dihang nagsinukliay na og mga puntos ang duha ka kampo ug diha na nakalabaw ang Top V, 65-64 kortesiya ni Rizane sa oras nga 1:44 ang nahabilin sa duwa.
Mibawos sab dayon ang Lakers sa tira ni Eboy Quiñahan, 66-65, apan si Rizane mipasud og laing dos puntos alang sa ilang 67-66 nga labaw.
Sila si Quiñahan ug Raymundo Carvajal maoy misalida sa Lakers nga mikandos og 15 puntos matag usa.
Sa pasiunang duwa, ang Rostata milubong sa Larrobis, 86-72 alang sa ilang 3-4 nga baraha.
Gipangulohan ni Clark Monsanto ang kadaugan nga mitikdol og 29 puntos, gisundan ni Ariel Ocier sa iyang 20 puntos ug Glen Rostata nga adunay 15 puntos.
Tulo sab ka players ang mihimo’g double figures alang sa Larrobis pinangulohan nilang Ebyong Ouano ug Llanos nga mitusak og 13 puntos matag usa, samtang si Richard Madrid mitimang og 12 puntos.
Sa laing duwa, ang AC Troopers ni team owner SPO4 Dondon Coloscos midaog pinaagi sa ‘forfeiture’ batok sa Avengers ni Arnold Pestaño.
Ang liga nga gibendisyonan ni LABA president Gilbert Sebandal gipadagan ni league commissioner Geryl Bukiron inabagan nilang Lloyd Chavez, Ramil Baclay ug Allan Recla ug ingon man nilang Chang Tejero, Henry Fontanosa, Arjan Wenceslao ug Eduard Escorial sa CEBRA.
PUNTOS MATAG USA
Unang duwa:
ROSTATA (86) – Monsanto 29, Ocier 20, Rostata 15, Catinoy 9, Renzen 5, Jacalan 4, Lamparas 4.
LARROBIS (72) – Ouano 13, Llanos 13, Madrid 12, Niez 9, Yatan 9, Caballero 6, Delima 3, Malazarte 3, Uy 2.
Ikaduhang duwa:
TOP V (69) – Rizane 20, Bukiron 19, Gelbolingo 8, Echavez 8, Puerto 6, Magale 4, Rempojo 2, Alcover 2.
LAKERS (66) – Carvajal 15, Quiñahan 15, Marturillas 9, Herbito 8, Gonzaga 8, Oljol 5, Costanilla 4, Cena 2.
- Latest
