Water market kampiyon na gyud sa power forty

CEBU, Philippines - Natambalan na gyud ang kauhaw sa Water Market nilang team managers Vez Eleguin ug Fred Tantoy human makaipsot sa ‘knockout’ finals batok sa paboritong HLY, 96-94 pinaagi sa overtime aron masakmit ang korona sa Power Forty basketball tournament 2015 niadtong Martes sa gabii didto sa Inayawan Sports Complex.

Mao kini ang labing unang titulo sa Water Market sud sa 11 ka tuig nilang pangindahay.

Si Joel Jaca maoy bayani  sa dakung kalampusan sa Water Market human mapasud ang iyang krusyal nga itsa sa himalatyong oras sa overtime.

Gawas pa niini, si Jaca mao sab ang nangu sa balanseng opensa sa Water Market pinaagi sa iyang 24 puntos. Laing mihimo’g double figures mao sila si Caloy Lim nga mikandos og 21 puntos, Roldibert Tantiado nga misablig og 17 puntos ug Michael Veloso nga adunay 12 puntos.

Sayo unta nga makuha sa Water Market ang daog dihang nagtabla ang iskor, 85-all sa daginutong oras sa regulasyon, apan si Lim misipyat sa iyang tira dayong kapupos sa oras nga maoy nagtukmod sa duwa ngadto sa overtime.

Sa dugang singko minutos, ang duha ka magkaribal nagma-binantayon na sa tuyo nga modaog, apan ang Water Market maoy mipatigbabaw ug naangkon ang korona.

Ang HLY ni Atty. Flor Yosores gipangulohan ni Cocoy Dequit, kinsa mikamada’g 28 puntos, gisundan ni Nando Sumargo nga adunay 19 puntos. Sila si Alex Mercado ug John Tantay mitampo’g 15 ug 12 puntos alang sa HLY nga nakahimo pa sa paglabaw sa third period, 62-50.

Sa duwa alang sa ikatulong dapit, ang Bob & Chino nilang  Bob Samson ug Chino Kalinga nakaipsot sab batok sa Zebra Helmet sa iskor nga 91-89.

Gipangulohan ni Edward  Buhay ang kadaugan nga mipatuasik og 32 puntos.  Nakakuha sab siya og igong suporta gikan nilang Mario Libre ug Jun Abapo nga nagkumboya’g 31 puntos.

Si Robert Abasolo mao sab ang nangu sa Zebra Helmet ni Alan Lim nga mipabuhagay og 40  puntos, samtang si Nonie Sabandija mitikdol og 12 puntos.

Ang maong torneyo nahimong posible tungod sa paningkamot sa mga opisyales sa Power Forty  Ball Club pinangulohan  sa ilang presidente nga si Lando Almojallas.

Lain pang mga opisyales sa Power Forty mao sila si Alan Lim (vice president-internal), Domie Labalan vice president-external), Bert Cayobit (secretary/auditor), Dome Ozon (treasurer).

Si CESAFI head referee Edwin Dejacto Sr. mao ang  commissioner.

Ang board of director naglakip nilang Atty. Flor Yosores, Lando Almojallas, Vez Eleguin, Fred Tantoy, Alan Lim, Romy Rama, Bob Samson ug  Chino Kalinga.

PUNTOS MATAG USA

Unang duwa:

(for third)

BOB & CHINO (91) – Buhay 32, Libre 16,Abapo 15, Cabrera 8, Yatan 8, Abellanosa 6, Cabaluna 6.

ZEBRA HELMET (89) – Abasolo 40, Sabandija 12, Chiong 9, Gaviola 8, Piezas 6, Belleta 4, Carbonilla 2, Dimitiman 2, Marturillas 2, Ungria 2, Villaver 2.

Ikaduhang duwa:

(Championships)

WATER MARKET (96) – Jaca 26, Lim 21, Tantiado 17, Veloso 12, G. Fuentes 8, Dumale 4, Eleguin 4, Traya 4, T. Fuentes 2.

HLY (94) – Dequit 28, Sumargo 19, Mercado 15, Tantay 12, Alcordo 9, Capala 9, E. Navares 6, Ebrado 4, Nacional 2.