Tabal andam na sa L.A. Marathon

CEBU, Philippines -  Sakto na sa kusog ang marathon queen sa nasud nga si Mary Joy Tabal sa iyang pagsungasong sa  LA Marathon karong Domingo (Lunes sa Pilipinas) nga manukad didto sa Dodger’s Stadium sa Los Angeles, California.
Dili sayun ang hagit ni Tabal tungod kay makiglumba siya sa mga bangiitang runners sa kalibutan. Gawas sa mga US runners, mga foreign athletes gikan sa 54 ka nasud ang mangapil usab sa LA Marathon.
Di makauban ni Tabal iyang coach nga si John Philip Duenas kinsa wala kakuha og US visa, apan bisan pa niini ang Cebuana runner desidido nga mopakita og nindot nga labok sa maong lumba.
Tuyo ni Tabal nga mas mapalambo pa ang iyang performance sa miaging Paris Marathon diin misulod siya sa top 21 overall finishers.
Uban ni Tabal si Raphael Poliquit Jr. kinsa maoy Pinoy nga mulumba usab didto sa LA. Sila si Tabal ug Poliquit gigastuhan og gipadala sa LA Marathon sa Nestle Philippines human usab sa ilang kadaugan sa miaging National Milo Marathon. (BANAT NEWS)