San Miguel nangandoy og daog batok NLEX

CEBU, Philippines – Laraw sa San Miguel Beermen nga mahaw-as sa ilawom nga bahin sa standing pinaagi sa pagsakmit sa ikaduha nilang daog sa PBA Commissioner’s Cup batok sa NLEX Road Warriors karong adlawa didto sa Cuneta Astrodome.

Ang San Miguel ug NLEX magsangka karong alas-4 sa hapon sa dili pa ang main game tali sa Alaska Aces ug Barako Bull Energy Cola sa alas-7 sa gabii.

Lab-as pa sa ilang dominanteng kadaugan batok sa Meralco Bolts niadtong Sabado, ang Beermen gusto  pang mobangon gikan sa ngil-ad nga 0-4 nga sugod sa conference.

Si Beermen coach Leo Austria nagtuo nga daku ang kausaban sa opensa sa koponan sa pagkuha nila ni AZ Reid isip bag-ong import diin miiskor dayon kini og 34 puntos sa una niining duwa. Hinuon, ang San Miguel  angayan sab nga magbantay tungod kay sangkaon nila ang gutom nga NLEX, kinsa gusto usab mopalambo sa ilang 1-4 win-loss record. (BANAT NEWS)