Barnachea kumpiyansa sa kanilang tsansa sa Ronda

ANTIPOLO CITY, Philippines--Sasabak ang Navy-Standard Insurance, binabanderahan ni long-time leader Santy Barnachea at ang bagong hugot na si Ronald Oranza, sa Championship round ng Ronda Pilipinas 2015 na inihahandog ng LBC sa Feb. 22-27 na puno ng kumpiyansa matapos dominahin ang Luzon qualifier kamakailan.

“Maganda itong morale-boosting para sa team namin,” sabi ni Barnachea, naghari sa inaugural edition ng Ronda noong 2011.

Optimistiko si Barnachea sa kanilang tsansa matapos pumuwesto ang kanyang koponan sa two-stage Luzon leg.

Winalis ni Oranza, miyembro ng national team na sumama sa Navy, ang mga labanan sa Tarlac at Antipolo stages bukod sa pagiging King of the Mountain at sprint king winner.

Dahil dito, ibinulsa ni Oranza ang premyong P123,000.

Ang second at third placers ay mula rin sa Navy.

Ito ay sina Jan Paul Morales, Barnachea at John Mark Camingao.

Napasama rin sa Championship round sina Navymen Lloyd Lucien Reynante, Joel Calderon, Rudy Roque at El Joshua Carino na tumapos sa top 20 ng Luzon phase.

Ang iba pang maglalaro sa finale ay sina national team standout George Oconer, Jr., Jerry Aquino, Jr., Daniel Asto, Rustom Lim, Ronald Lomotos, Mark Julius Bordeus, Alfie Catalan at Dominic Perez.