Lady Archers puntirya ang twice-to-beat vs Tigresses
MANILA, Philippines – Makikita kung totohanan ba ang pagpapanalo na ginagawa ng UST Tigresses sa pagharap sa La Salle Lady Archers sa 77th UAAP women’s volleyball ngayon sa The Arena sa San Juan City.
May apat na dikit na panalo ang UST para makabangon mula sa 1-5 karta at malagay sa ikatlong puwesto sa 5-5 baraha.
Ang laro ay magsisimula sa alas-4 ng hapon at pakay din ng Lady Archers na promal na okupahan ang twice-to-beat advantage sa Final Four.
Unang magkikita ang nagdedepensang Ateneo Lady Eagles laban sa FEU Lady Tamaraws sa alas-2 ng hapon at balak ng una na dagitin ang ika-11 sunod na panalo.
Kung mangyari ito ay tatlong laro na lamang ang kailangang kunin ng Ateneo para makumpleto ang sweep sa elimination round at magkaroon ng thrice-to-beat sa championship round.
Hindi naman papayag ang Lady Tamaraws na mangyari ito dahil nangangailangan sila ng panalo para tumatag ang paghahabol sa upuan sa susunod na yugto.
May 4-6 karta ang FEU at kasalo ang mga pahingang National University Lady Bulldogs, UP Lady Maroons at Adamson Lady Falcons sa ikaapat hanggang ikapitong upuan.
Nakikitaan uli ng ganda ng paglalaro ang mga beteranang sina Carmela Tunay, Marivic Meneses at Pam Lastimosa para makipagtulungan sa mga mahuhusay na bagitong manlalaro tulad ni Ennajie Laure.
“Makikita natin kung talagang nag-improve kami sa larong ito,” wika ni UST coach Odjie Mamon.
Ipaparada naman ng Lady Archers ang mga mahuhusay na sina Ara Galang, Mika Reyes at Cydthealee Demecillo para masungkit ang three-game winning streak sa ikalawang ikutan.
- Latest
