Warriors midaog, 17-2 na samtang Sixers nakaduha Golden State daog batok Chicago Bulls, 10-1 sa road games

CEBU, Philippines – Matud pa ni Steve Kerr nga siya karon maoy pinakabulahan o swerte nga coach sa NBA kini human mokulit og franchise record nga 12 ka sagunson nga daog alang sa 17-2  nga baraha ang iyang team nga Golden State Warriors ug league-best nga 10-1 record sa ilang road games.

Midaog ang Warriors kagahapon batok sa Chicago Bulls, 112-102  didto sa United Center sa  Chicago, Illinois.

''They're easy to coach. They're really talented. They're unselfish. I'm just lucky," matud pa  ni Kerr.

Si  Draymond Green mihimo'g  career-high 31 puntos aron pangulohan ang  Warriors samtang midugang og 24 puntos si  Klay Thompson kinsang 17-2 nga baraha mao karo'y pinakamaayo'g  record.

Si Jimmy Butler maoy nangu sa Bulls (12-8) sa iyang 24 puntos samtang may 22 puntos si Pau Gasol uban sa iyang 20 ka rebounds.

Ang Warriors kanhi mihimo'g franchise-record nga 11  ka sagunson nga daog  gikan niadtong Disyembre  29, 1971 ngadto sa Enero 22, 1972.

''You're talking about a franchise that was historically known for losing, a new ownership group came in, and it completely changes the entire organization. It's a great feeling. We feel like we have a lot left in the tank," matud pa ni Green.

Samtang aduna karo'y 2-5 nga record ang Bulls sa ilang homecourt, naghupot sila'g 28-6 record batok sa Warriors sulod sa 35 ka tuig diin kanunay nilang pildehon ang Warriors.

Silang Thompson ug Green nagpauwan og duha ka three-pointers aron hatagan ang Warriors og 95-87 nga abante may 6:25 ang nahibiling oras sa duwa.Naka-iskor pa gyud og laing three-pointer si Green ug usa ka jumpshot aron inaton ang labaw ngadto sa 13 puntos. "

Matud pa ni Stephen Curry kinsa midaog didto sa United Center sa labing unang higayon, "It's been miserable. We've not only lost, but we've gotten beaten pretty bad here.''

Didto sa Auburn Hills sa Michigan, midaog ang Philadelphia Sixers batok sa host Detroit Pistons sa iskor, 108-101 pinaagi sa overtime.

Ang Pistons naka-angkon  na karon og 11 ka sagunson nga pilde ug silang duha sa Philadelphia karon maoy nanag-iya sa labing ngil-ad nga record sa NBA.

Ang Sixers aduna na karo'y 2-18 nga baraha human lang sila makahimo'g 0-17 losing skid.  (GGM gikan sa NBA.com) (BANAT NEWS)