Cebu leg sa Milo Marathon mihimo’g bag-ong record

CEBU, Philippines - Moabot ngadto sa 27,000 runners ang mosalmot sa 38th Milo Marathon Cebu leg sayo sa buntag ugma  nga manukad  atubangan sa Cebu Normal University (CNU) ug matapos sa Cebu City Sports Center (CCSC).

Ang local organizer nga si Ricky Ballesteros atol sa press conference kagahapon didto sa CCSC Conference Room miingon nga usa ka bag-ong record ang ikulit sa Milo Marathon tungod kay mabuak nila ang 25,000 attendance nga natala 10 ka tuig na ang milabay.

Adunay 791 ka partisipante sa 21K half marathon nga magsilbe sab nga qualifiers alang sa National Finals  sa Disyembre didto sa Manila.

Ang 10K adunay 409 ka  runners, 411 sa 3K, samtang ang kadaghanan nagagikan sa 5K category.

Sa laing bahin, ang mga organizers mangayo’g ‘fit-to-run’ certificate sa mga partisipante nga adunay pirma sa usa ka licensed physician pagmatuod nga  haom sila nga modagan  ilabi na ang runners sa 21K nga maoy qualifier alang sa 42K National Finals.

“This is the first time that we are requiring a medical certificate for the 21K runners. If they are not fit for the said distance or if they cannot submit the required certification from a doctor, we will assess them and see if they can join the shorter distance instead.This is part of our way of keeping up with international standards,” matud pa ni Milo Sports Executive Andrew Neri.

Ang buot mo-qualify sa National Finals kinahanglan nga tapuson niya ang 21K sud sa usa ka oras ug 15 minutos alang sa male runners ug 1:35:00 sa female runners. Aduna usab qualifiers sa tagsa-tagsa ka mga age-brackets.

Ang modaog sa open class makaangkon og all-expense paid trip ngadto sa Manila, samtang ang mga age-bracket qualifiers mobayad sa kaugalingon nilang biyahe apan libre na ang ilang registration alang sa national finals.

Ang top 10 finishers sa matag kategoriya makaangkon og cash prize, trophies ug medals.

Gawas sa kompetisyon, ang lumba usa sab ka advocacy run diin ang mga runners makabaton og kahigayonan nga motabang sa mga kabus nga tinun-an nga mahatagan og sapatos sa ‘Help Give Shoe’ advocacy sa Milo. Ang mga makadawat og sapatos mao ang mga tinun-an  sa mga lugar nga apektado sa super typhoon Yolanda nga naglakip sa Tacloban, Ormoc ug Eastern Samar.