Cebu mo-host AUBC Cagefest

CEBU, Philippines – Andam na ang Sugbo alang sa pag-host sa 10th Asian University Basketball Championship  (AUBC) nga gitakda sa Oktubre 22-26 sa nagkalain-laing dapit sa probinsiya.

Ang lima ka adlaw nga torneyo nga naila sab nga 1st Cebu Province International Inter-Collegiate Championships adto sugdan sa Bogo City sa Oktubre 22. Ang mosunod nga mga duwa  dad-on sa Minglanilla ug sa Dalaguete sa habagatang bahin sa Sugbu, samtang ang katapusang duha ka adlaw sa duwa diha himuon  sa University of San Carlos (USC) main gym.

Lima ka teams ang mosalmot – tulo ang local  ug duha ang international.

Kompirmado nang mosalmot ang Myongji University sa South Korea apan dili madayon ang Huaquiao University sa China tungod sa travel ban nga giimplementar  sa Chinese government batok sa Pilipinas.

Dili sab makasalmot ang University of San Jose-Recoletos (USJ-R) kay adto  sila mopakita’g aksiyon sa University Games sa Oktubre 20-28 didto sa Iloilo.

Bisan pa niini,  si event organizer Lorenzo ‘Chao’ Sy naglaum og kulbahinam nga duwa nga naglakip sa  Myongji University sa South Korea nga makigsangka batok sa mga lig-ong collegiate teams sa Sugbo nga pangulohan sa  University of San Carlos  Warriors, Southwestern University  Cobras ug University of the Visayas  Green Lancers. Sa pagka karon, si  Sy miingon nga nangita pa siya og team gikan sa Thailand, Malaysia o di ba Vietnam nga mopuli sa lugar nga gibakantihan sa Myongji ug USJ-R.

Ang mga partisipante  moduwa og single round robin format. Ang team nga adunay nindot nga rekord human sa lima ka adlaw nga kompetisyon maoy ilhong kampiyon. Ang top performer sa local team  makakuha og katungod nga morepresentar sa nasud alang sa XXVIII Summer Universiade nga gikatakda sa Hulyo 3-14, 2015 didto sa Gwanghju sa South Korea.

Ang AUBC cagefest gipaluyohan sa Cebu provincial government ubos sa liderato ni  Governor Hilario ‘Junjun’ Davide III. Gipaluyohan sab kini nilang Mayor Celestino ‘Junnie’ E. Martinez Jr. sa Bogo City, Mayor Lani Peña sa Minglanilla ug Mayor Ronald Cesante sa Dalaguete. (BANAT NEWS)