Nagmingaw gyud ang payag kay atong damgo nakay-ag

CEBU, Philippines- Natapos na ang 16 ka adlaw nga 17th Asiad didto sa Incheon, South Korea ug nunot sa pagtik-op sa maong international nga kumpetisyon, ato lang sab ilubong sa kalimot ang masakit natong gidangatan nga bisan sa tumang paningkamot, kutob lang gyud sa ikapitong pwesto ang atong naabot sa natad sa basketball nga kita unta'g banggi-itan kaniadto ug sa 46 ka nasud nga misalmot, didto kita molandig sa ika-22 nga pwesto sa overall medal rankings.

Wala na gyud kita'y angay pang ikapanghamhug kay sama sa bagyo, milurang sab ang atong pwersa dili sama kaniadto nga kita maoy gika-intapan sa tibuok Asya sa natad sa basketball. 

Human sa 16 ka adlaw natong pakigbisog, igo lang kitang nakakuha'g 15 ka medalya--- usa ka gold medal, 3 ka silver ug 11 ka bronze nga mas ubos sa atong nakab-ot sa miaging upat ka tuig didto sa Guangzhou, China diin mihakot kita'g 16 ka medalya --- 3 ka gold, 4 ka silver ug siyam ka bronze.

Niadtong 2010 Asian Games, kita maoy no. 6 sa basketball kumpetisyon ug tungod niadto, atong gireporma o gipalig-on ang atong Philippine Team nga Smart Gilas sa tinguha nga moabante kita sa unahan apan ang atong kanhi coach nga Serbian nga si Rajko Toroman, mas arang-arang pa diay kay sa atong kadugo nga naghatud kanato sa ikapitong pwesto.

Sa wala pa ang 2013 FIBA Asia diin kita maoy host niadtong Agosto sa miaging tuig, nagpalig-on ang Gilas ug tuod man, wala pakyasa ni coach Chot Reyes ang nasud nga Pilipinhon pinaagi sa pag-abante sa finals batok sa Iran. Sa kadaogan pa lang nato batok sa South Korea, ato nang nakuha ang luna alang sa FIBA World Cup sa Spain ug niadtong tungora, nag-alintabo sa kadasig ang mga Pinoy basketball fans kay lagi kuno daghan gyud kita'g maligsan nga mga nasud kay milig-on kita nga gidasonan pa gyu'd kunohay og libro nga giulohan "11 Days of August" gumikan kay 11 man ka adlaw ang FIBA Asia gikan sa Agosto 1 ngadto sa Agosto 11.

Sa nagsingabot na ang FIBA World Cup, mibiyahe'g sayo ang Gilas alang sa mga tune-up games ug tungod kay midaog kita sa pipila ka mga tune-up games, atong gi-condition ang atong utok nga lig-on gyud kita sa wala'y kasayoran nga igo lang diay kitang gipatambok daw baboy nga ihawonon. 

Kini gong atong kampanya sa basketball taghap-taghap lang. Kung modaog kita bisan taghap, mo-ingon dayon kita nga maayong laki na apan kun mapilde, gitikasan kita og gipatay sa referee. Kita ra tingali ang team nga midaog apan natagak ug ang napilde maoy miabante nga dili man unta "pirde gana" ang atong giapilan basketball man unta.

Tug-ani kuno ako ninyo asang dapita man kita molandig sa Olympics. Ibutyag ang iyong mga bulawanong huna-huna sa [email protected].

MISCELLANEOUS. Belated birthday greetings to basketball legend Ramon"El Presidente" Fernandez who turned another milestone last October 3. I was still watching black and white TV just to watch Mon and his RP Team teammates winning the championship against South Korea in 1973. Now, I am blessed I can see Mon personally and shake his hand, can chat with him and can text with him anytime. Thanks God I am a sportswriter to have this great privilege. My son, Matt Erikson who is a student teacher of the Cebu Normal University and is having an assignment in San Fernando, Cebu wishes to thank his very accommodating and hospitable mentors at the San Fernando Central Elementary School namely Sheila Barcelo, Rowena Omamalin and Melodina Paradro. Belated birthday greetings too to Amiell Maurice Paradero last October 2.