S.V.F. Designed & Build kampiyon na sa AS-ES B.A.R. fiesta Cup 2014
CEBU, Philippines – Mitarok og 76-71 nga kadaugan ang S.V.F. Designed & Build batok sa R.A. Essentials aron maugkat ang titulo sa As-Es B.A.R. 2nd Conference basketball tournament niadtong Agosto 25 diha sa Benjamin Solon Memorial gym sa Cogon Ramos, Cebu City.
Ang sakop sa S.W.A.T.-Cebu City nga si Bart Sanchez maoy nangulo sa opensa sa S.V.F. Designed & Build ni team owner Archt. Christian Benedict Ferrer Nellas pinaagi sa iyang 21 puntos, diin 12 niini iyang nahimo sa fourth quarter nga angay usab alang kaniya aron mahimong MVP niining conference.
Si Sanchez nakakuha sab og suporta gikan nilang Francis Rafols ug Michael Roel Llanos nga miabuno’g 17 ug 10 puntos matag usa.
Mipabuhagay dayon og mga puntos ang S.V.F. Designed & Build pagsugod sa duwa aron ilubong og sobra katunga ang R.A. Essentials paghuman sa unang 10 minutos sa duwa, 26-11.
Bisan pa sa maong labaw, ang R.A. Essentials ni team owner Rick Bastida nakahimo gihapon paglaslas sa labaw ug misikit, 50-51 paingon sa final period. Apan wala sila makalahutay ug nahutdan og kusog sa daginutong mga oras sa duwa hinungdan sa ilang pagsugamak.
Si Sambag 1 Brgy. Capt. Lemar Alcover ug si barangay Calubihan councilor Rex Millan nagtambayayong og 28 puntos aron pangulohan ang R.A. Essentials.
Mihimo sab og double figures sila si Rocky Bacalso ug Mico Llagas alang sa napildeng R.A. Essentials. (BANAT NEWS)
- Latest
