Ateneo pinalakas pa ang tsansa
MANILA, Philippines - Isinantabi ng Ateneo Lady Eagles ang pananakit ng tiyan ng mga key players gamit ang determinasyong manalo para maiuwi ang 25-21, 22-25, 17-25, 25-19, 15-9, panalo sa Air Force Air Spikers sa Shakey’s V-League Season 11 Open Conference quarterfinals kagabi sa The Arena sa San Juan City.
Tumapos si Alyssa Valdez tangan ang 26 kills at tatlong blocks tungo sa 29 puntos pero hindi niya mag-isang binalikat ang koponan para makuha ang ikalawang sunod na panalo at 4-5 kabuuang baraha.
May limang blocks si Amy Ahomiro tungo sa 15 puntos habang sina Kassaranda Miren Gequillana at Bea De Leon ay nagsanib sa 26 puntos.
Ang liberong si Dennise Lazaro ay may 19 excellent digs at 11 excellent receptions para tumibay pa ang paghahabol ng Lady Eagles ng puwesto sa semifinals sa ligang inorganisa ng Sports Vision katuwang ang Shakey’s bukod sa ayuda ng Accel at Mikasa.
“We play for each other and for the team kaya siguro natiis namin ang pain,” wika ni Valdez na nakipagtulungan kay Ahomiro para makabangon mula sa 1-2 iskor.
Ang huling dalawang blocks ni Ahomiro ang siyang tumapos sa hininga ng Air Spikers para sa kanilang ikaapat na kabiguan laban sa anim na panalo.
Ipinagdiwang ni Rachel Ann Daquis ang kanyang pagbabalik sa Army Lady Troopers nang tulungan niya ang koponan sa 25-22, 25-15, 22-25, 25-16, panalo sa nagdedepensang Cagayan Valley Lady Rising Suns sa unang laro.
May 13 kills at dalawang aces si Daquis tungo sa 18 puntos upang suportahan ang 19 ni Nerissa Bautista.
Sina Jovelyn Gonzaga ay may 14 puntos, tampok ang tatlong blocks at may 9 digs pa, si Mary Jean Balse ay may 12 puntos at si Tina Salak ay naghatid ng tatlong blocks at 38 excellent sets.
“Nilaro lamang namin ang laro na atake nang atake,” wika ni Army coach Rico de Guzman na sinaluhan sa unang puwesto ang pahingang PLDT Home Telpad Turbo Boosters sa 7-2 baraha.
Nalaglag sa ikatlong puwesto ang Lady Rising Suns sa 6-2 karta.
- Latest
