Generals at Chiefs hangad makasosyo sa liderato
MANILA, Philippines - Mag-uunahan ang Emilio Aguinaldo College at ang Arellano University sa pagpoposte ng 2-0 record para makasalo sa liderato ang four-peat champions na San Beda College at Perpetual Help.
Maghaharap ang Generals at ang Chiefs ngayong alas-2 ng hapon sa 90th NCAA men’s basketball tournament sa The Arena sa San Juan City.
Nagmula ang EAC sa 81-72 panalo laban sa College of St. Benilde noong Miyerkules.
Umiskor naman ang Arellano ng isang come-from-behind 93-80 win laban sa Lyceum.
Umaasa si head coach Gerry Esplana na muling babandera si Cameroonian import Noube Happi para sa Generals katuwang sina rookies Ariel Aguilar at Jeraldo Serrano.
Humakot ang 6-foot-7 na si Happi ng 12 points, 17 rebounds at 3 blocks, habang nag-ambag sina Aguilar at Serrano ng pinagsamang 25 points para sa panalo ng EAC sa St. Benilde.
Kumamada si Aguilar ng tatlong three-point shots at tumapos na may 12 points para sa Generals.
Ang depensa naman ang itatapat ng Arellano ni mentor Jerry Codiñera sa opensa ng EAC.
“We have to make sure to check Happi and also stop their shooters,” wika ni Codiñera, pumalit kay Koy Banal sa bench ng Chiefs.
- Latest
