Milo BEST SBP Passerelle sugdan ugma sa SHS-AdC Mandaue campus

CEBU, Philippines - Buksan na ugma ang Cebu leg sa 2014 BEST Center SBP Passerelle Twin Tournament nga gipaluyohan sa Milo diha sa Lux Oriens Gym sa Sacred Heart School-Ateneo de Cebu.

Walo ka teams ang mosalmot sa Passerelle division, samtang  unom sa SBP.

Ang mga teams sa Passerelle division  nga alang sa mga players nga nahimugso niadtong tuig 1999, 2000 ug 2001 mao ang USC, CEC, USJ-R ug USPF sa Group-A ug UV, SHS-AdC, DBTC ug SWU sa Group-B.

Ang duha ka grupo mopailawom og single round robin elimination phase diin ang top two teams maoy moabante ngadto sa cross-over semifinals.

Sa SBP division nga alang sa mga players natawo sa tuig 2002, 2003 ug 2004 aduna lamang kini usa ka grupo nga  pangulohan sa back-to-back Cebu champion USC, UV, SHS-AdC, DBTC, USJ-R ug CEC.

Ang regional finals  karong tuiga adto himuon  sa Roxas City sa Nobiyembre ug  ang national finals anhi dinhi sa Sugbu unya sa Disyembre.  (BANAT PALARO)