Gabica, Orcollo sud sa finals 64

CEBU, Philippines -  Ang Sugbuanong pool master nga si Antonio 'Gaga' Gabica ug Dennis Orcollo maoy nangu sa laing upat ka Pinoy players nga miabante sa finals 64 knockout stage sa WPA World 9-ball Championship didto sa Al Saad Sports Club sa Doha, Qatar.

Si Gabica, ang runner-up sa miaging tuig mipilde ni Michel Bartol sa Croatia, 9-3, samtang ang taga-Butuan City nga si Orcollo mitagak ni Ko Ping Chung sa Taiwan, 9-5.

Uban nilang Gabica ug Orcollo nga moduwa  sunod hugna mao silang  Elmer Haya sa Cagayan de Oro City, Carlo Biado, Raymund Faraon, Jeffrey de Luna ug Johann Chua.

Si Haya miiskor og kulbahinam nga daog batok ni Artem Kosvhovyi sa Ukraine, 9-8, si Biado mipukan ni  Tom Storm sa Sweden, 9-7, si  Faraon midaog batok ni Young Hwa Jeong sa South Korea, 9-7, samtang si De Luna mipilde sa laing Sugbuanon nga si Israel Roa, 9-3.

Sa iyang bahin, si Chua, impresibo kaayo iyang ikaduhang adlaw diin gitaktak niya si Lo Li Wen sa Taiwan ning usa ka semana nga torneyo nga gisalmotan sa mga banggiitang billiard players sa tibuok kalibotan.

Ang garbo sa Sugbu nga si Warren Kiamco ug iyang kababayan nga si Elvin Calasang nasugamak sa ikatulong adlaw sa aksiyon, apan aduna pa gihapon sila'y purohan nga makasud sa main event kun modaog sila sa ilang duwa karong adlawa.

Napilde si Kiamco ngadto ni Neils Feijen sa Netherlands, 6-9, samtang napukan sab si Calasang ngadto ni Wu Jiaqing sa China, 7-9. (BANAT NEWS)