Cebu Inter-collegiate caging buksan karon

CEBU, Philippines -  Eksplosibong aksyon sa basketbol ang masaksihan  sa mga Sugbuanon nga hilig sa maong duwa dihang ang Cebu City Mayor's Cup Inter-Collegiate Basketball Tournament buksan karong adlawa diha sa Cebu Coliseum.

 Ipamatuod sa bisitang San Beda Red Lions ang rason nganong nahimo silang NCAA four-peat champion sa dihang ilang sangkaon ang  University of San Jose-Recoletos (USJR) Jaguars sa main game sa alas-7 sa gabii.

 Sa dili pa sugdan ang duwa, adunay pagahimuon nga yanong opening ceremony nga sugdan sa usa ka dance number ug  ang pormal nga pagpaila sa mga  koponan pinaagi sa entrance of athletes uban sa ilang mga muse.

 Matud pa ni Lorenzo 'Chao' Sy, usa sa mga organizers, nga moabot karong alas-7 sa buntag ang San Beda ug temporaryo kining mopuyo sa Hotel Fortuna  nga iya sab nga gipanag-iya atol sa tulo ka adlaw nga torneyo.

 Human sa opening program, mosalida dayon ang Team Sugbu ni Mayor Michael Rama batok sa Team Bogo ni Mayor Junnie Martinez sa usa ka exhibition game sa alas-4 sa  hapon.

 Mosunod sab dayon ang sangka tali sa 2013 Cebu Schools Athletic Foundation Inc. (CESAFI) champion University of the Visayas (UV) Green Lancers ni coach Felix 'Donbel' Belano batok sa University of San Carlos (USC) Warriors ni coach Junthy Valenzuela nga sugdan sa alas-5:30 sa  hapon.

 Ang partisipanteng koponan moduwa og single round robin format diin ang team nga adunay labing maayong rekord maoy ilhong kampiyon sa maong torneyo nga gipaluyohan sa Cebu City Sports Commission (CCSC).

 Ang kampiyon mobulsa og P50,000, samtang ang second ug third placers mobitbit og  P30,000 ug P20,000  matag usa.

Mopahiluna sa ikaupat makadawat og consolation prize nga  P10,000.

 Ang mga tiket sa maong  duwa mapalit sa tag-P250 sa  stage seats, P150  sa ringside, P100 sa lower box,  P50  sa upper box ug P20 alang sa general admission.

 Sa opening karong adlawa libre ang general admission, apan  sa Sabado ug Domingo magbayad na ang motan-aw. Adunay 50 percent discount ang mga estudyante nga makapakita sa ilang ID sa gates. (BANAT PALARO)