7th Mayor's Cup Run gikatakda sa Mayo 4

CEBU, Philippines -  Gisugdan na niadtong adlaw'ng Lunes ang registration sa 7th Mayor's Cup Run nga gikatakda sa Mayo 4 nga magsugod ug matapos sa Parkmall grounds, Mandaue City.

 Hinugpong proyekto sa Mandaue City Sports  Commission (MCSC) ubos sa liderato ni executive director Engr. Ricardo 'Gaga' Mendoza ug Mandaue Runners Club (MRC), ang lumba kabahin sa mga  kalihukan sa tinuig nga kapistahan sa ilang mahal nga patron Señor San Jose sa Mayo 8.

 Mga kategoriya nga mahimong kapiliang daganan sa runners naglakip sa 21K half-marathon, 15K open, 15K open (60-above) ug 7K open.

 Aron paghatag og kahigayonan sa mga Mandauehanong runners, ang organizers mibutang og 7K inter-barangay category nga ekslusibo lang sa mga molupyo sa maong dakbayan. Kinahanglan magdala ang runner og barangay clearance sa ilang pagparehistro.

 Mahimong magparehistro sa Parkmall, Mandaue City Cultural and  Sports  Complex, Runnr Ayala-Cebu ug sa ARC Runner.

 Ang registration fee nagkantidad og P500 sa 21K, P350 sa 15K ug P300 sa 7K.

 Gawas sa ganting salapi, ang top four finishers sa 21K half-marathon makadawat sab og tropeyo. Ang kampiyon mobulsa og P6,000, ang ikaduha ug ikatulo makadawat og P4,500 ug P3,000 matag usa. Mokapyot sa ikaupat makaangkon og P2,500.

 Ang top three finishers sa 15K (open ug 60-above),  7K (open ug inter-barangay) makadawat sab og ganting salapi ug tropeyo. Ganting salapi ug medalya ang maangkon niadtong motapos sa ikaupat ug ikalima sa 15K open ug sa 7K open. Ang  three sa 15K open mobulsa og P5,000, P4,000 ug P3,000, samtang P3,000, P2,000 ug P1,000 ang maangkon sa 7K open ug 7K inter-barangay.

 Alang sa dugang mga impormasyon, mahimong mokontak ni MRC president Hector Cuizon (09238185312),  MRC vice president Heide Flores (09237160782), MRC auditor Doris Nodalo (09235629616) ug MRC chairman Emok Branzuela (09279384924).

 Uban pang mga opisyales sa MRC mao sila si Dhalia Urot (secretary), Suzine Gentapa (treasurer) ug Jose Roy Lansang (head operation).

 Gawas sa Parkmall, ang lumba gipaluyohan sab sa A. Runner Circle, Runway, Runnr Ayala-Cebu, Bardahl, RJC Trucking ug Glean Signage. (BANAT NEWS)