CFGA Kingdom Builders hari sa 34-above sa 4th FCA basketball tournament

CEBU, Philippines - Gibali-balian og pako sa CFGA Kingdom Builders ang Faith Tabernacle Eagles aron makuha ang 34-above title sa 4th Federation of Christian Athletes (FCA) Basketball League niadtong Domingo didto sa Cebu Coliseum.

 Silang Jerome Napao ug Jun Kent Manzo parehong mitipak og 14 puntos, samtang ang kanhi commercial cager nga si Rey de la Victoria mipaksit og 10 puntos alang sa CFGA nga milabaw og tres puntos paghuman sa unang 10 minutos sa duwa, 17-14.

 Mibugnaw ang kainit sa CFGA sa second period nga naghatag og higayon sa Eagles  pag-ilog sa labaw sa halftime, 24-22, apan mibalik ang ilang kamangtas sa third quarter aron ilogan pagbalik ang momentum, 36-32.

 Namintinar sa  CFGA  ang momentum sa nanghinapos nga bahin  sa  duwa  aron  maangkon ang  nuybe   puntos nga kadaugan.

 Ang Faith Tabernacle  Eagles gipangulohan ni Christian Floyd Taboada, kinsa mihimo'g game-high 20 puntos,  gisundan ni Erick Edfel Martelino  nga midagit og 15  puntos.

 Sa sayo pa, sila si Kareem Alocillo ug John Alocillo nagkumboya og 31 puntos ug si Joffer Hernando mitampo'g 12 puntos dihang ang CCF midemolis sa PC Nets, 82-59 aron sakmiton ang ikatulong dapit.

 Bugtong si Ramfel Tundag lang ang miiskor og double-figure alang sa PC Nets nga adunay 10 puntos.

 Ang duha ka bulan nga torneyo nahimong posible pinaagi sa suporta sa Psalm Property, Eagles Vantage, T&G Omnia+, Apple Tree Suites ug M. Lhuillier Kwarta Padala.