Ang mananalo ang sasagupa sa Rain or Shine, finals seat pag-aagawan ng Ginebra at San Mig

MANILA, Philippines - Ito na ang laro kung saan aabante ang mananalo sa best-of-seven championship series, habang ang ma­tatalo ay magkakaroon ng bakasyon.

Nagtabla sa 3-3, tatapusin ng Barangay Ginebra at ng San Mig Coffee ang kanilang best-of-seven semifi­nals showdown sa Game Seven ngayong alas-8 ng ga­bi para sa 2013-2014 PBA Philippine Cup sa Smart Ara­neta Coliseum.

Bumangon ang Gin Kings mula sa isang 14-point de­ficit sa second period para balikan ang Mixers, 94-91, sa Game Six noong Lunes.

“Nakuha namin ang right formula the last time out,” sa­bi ni Ginebra coach Ato Agustin. “Walang pagbabago sa Game Seven, pipilitin namin uling gawin ang mga ta­ma naming ginawa sa Game Six.”

Naging inspirasyon din ng mga Gin Kings ang pagbi­bigay sa kanila ng mensahe ni ‘Living Legend’ Robert Ja­worski, Sr. sa kanilang dugout sa halftime.

“Sabi nga ni Sen. Jaworski, huwag naming sayangin ‘yung suporta ng taong bayan sa amin,” ani guard LA Te­norio.

Hangad naman ni mentor Tim Cone na maipasok ang San Mig Coffee sa kanilang ika-25 finals appea­rance.

“It’s been a great series, a tough series with a lot of drama, and it seems only fitting that it should go to a Game Seven,” wika ni Cone, kasalukuyang katabla si le­gendary coach Baby Dalupan sa paramihan ng PBA titles sa bilang na 15.