Sinulog Cup 2014 caging buksan ugma

CEBU, Philippines -  Ugma na gyud buksan ang Cebu City Mayor's Sinulog Cup 2014 Inter-Collegiate Basketball Tournament diha sa Cebu Coliseum.

 Ang upat ka adlaw nga torneyo gitakda unta niadtong Enero 23-26, apan giuswag kini sa mga tigpasiugda tungod kay ang mga magduduwa sa University of San Carlos (USC) Warriors dili makahimo sa maong petsa tungod kay aduna kini importanteng atimanon.

 Gawas sa USC Wariors, ang University of San Jose-Recoletos (USJ-R) Jaguars moduwa sab, apan ang highlight sa maong liga nga gipaluyohan sa Cebu City Sports Commission (CCSC) mao ang gubat sa duha ka magkaribal, ang University of the Visayas (UV) Green Lancers ug Southwestern University (SWU) Cobras.

 Ang duha dili lang magsangka alang sa dungog, kun dili alang sa P50,000 nga ganting salapi.

 Ang mga  partisipanteng koponan mosubay og single round-robin format diin ang top two teams maoy magbangga sa tinaktakay nga kampiyonato. (BANAT NEWS)